नवी दिल्ली : गुजरातमध्ये काही दिवसांवर विधानसभा निवडणुका पार पडणार आहेत. मात्र असे असताना दुसरीकडे भाजपामध्ये बंडखोरीला उधाण आल्याचे पाहायला मिळत आहे. कारण पक्षाशी बंडखोरी करणाऱ्या तब्बल १२ जणांना भाजपाने एकाचवेळी निलंबित केले आहे. यामध्ये सहा वेळा आमदारकी भुषवलेल्या नेत्यासह दोन माजी आमदारांचा समावेश असल्याची माहिती समोर येत आहे. या सर्वांनी पक्षाने तिकीट नाकारल्यानंतर गुजरात विधानसभा निवडणुकीसाठी अपक्ष म्हणून अर्ज दाखल केले आहेत.
पक्षाशी बंडखोरी करणाऱ्या १९ जणांवर आत्तापर्यंत निलंबनाची कारवाई करण्यात आली आहे. हे निलंबन सहा वर्षांसाठी करण्यात आले आहे. १ डिसेंबरला गुजरातमध्ये पहिल्या टप्प्यातील मतदान पार पडणार आहे. त्यासाठी उमेदवारी अर्ज दाखल करण्याची प्रक्रिया पूर्ण झाली आहे. अपक्ष उमेदवारी अर्ज दाखल केल्यानंतर भाजपाने नुकतेच सात नेत्यांचे निलंबन केले आहे.
भाजपाने या निवडणुकीत जवळपास तीन डझन विद्यमान आमदारांना उमेदवारी नाकारली आहे. त्याचबरोबर पाच मंत्र्यांचाही पत्ता कट केला आहे. त्यामुळे नेत्यांनी बंडखोरीची वाट पत्करली आहे. हिमाचल प्रदेश निवडणुकीदरम्यान प्रत्येक तिसऱ्या जागेवर भाजपाला बंडखोरीचा सामना करावा लागला होता. तिच समस्या आता २७ वर्षांपासून गुजरातमध्ये सत्तेत असतानाही भाजपाला भेडसावू लागली आहे.
गुजरातमध्ये दोन टप्प्यांमध्ये १८२ जागांसाठी निवडणूक होणार आहे. या एकूण जागांपैकी १० टक्के जागांवर भाजपाशी बंडखोरी केलेले उमेदवार निवडणूक लढवत आहेत. हिमाचल प्रदेश निवडणुकीसह गुजरात निवडणुकीचा निकालही ८ डिसेंबरला लागणार आहे.