पुणे, {प्रभात वृत्तसेवा}- राष्ट्रीय स्वयंसेवक संघाची वार्षिक अखिल भारतीय प्रतिनिधी सभा यावर्षी १५ ते १७ मार्चला नागपूर येथे होणार असून, लोकसभा निवडणुकीच्या पार्श्वभूमीवर बैठकीबाबत उत्सुकता आहे.
ही बैठक नागपूर येथील रा. स्व. संघाचे प्रमुख कार्यालय रेशीमबाग मधील ‘स्मृतिभवन’ परिसरात होणार आहे. बैठकीत २०२३-२४ च्या संघाच्या कार्याचा आढावा आणि आगामी वर्षाच्या (२०२४-२५) संघाच्या कार्य आराखड्यावर चर्चा होणार असल्याचे राष्ट्रीय स्वयंसेवक संघाचे अखिल भारतीय प्रचार प्रमुख सुनील आंबेकर यांनी दिलेल्या प्रसिद्धीपत्रकात नमूद केले आहे.
तसेच सरसंघचालकांसह अन्य सर्व अखिल भारतीय कार्यकर्त्यांचा प्रवास, स्वयंसेवक प्रशिक्षणासाठी संघ शिक्षा वर्गांच्या नव्या योजनेच्या कार्यान्वयनाबाबत विचार होईल. संघाच्या शताब्दीनिमित्त कार्य विस्तार योजनेच्या बळकटीकरणासोबतच विशेषतः आगामी शताब्दी वर्षाच्या उपक्रमांवर चर्चा होईल. प्रतिनिधी सभेत देशाच्या सद्यस्थितीचा विचार करून, महत्त्वाच्या विषयांवरही प्रस्तावही पारित केले जातील.
संघाची अखिल भारतीय प्रतिनिधी सभा दरवर्षी देशाच्या विविध भागात आयोजित केली जाते. दर तिसऱ्या वर्षी तिचे आयोजन नागपुरात केले जाते . प्रतिनिधी सभेत ४५ प्रांतातील १५०० प्रतिनिधी सहभागी होणार आहेत.
प्रतिनिधी सभेच्या बैठकीत सरसंघचालक डॉ. मोहन भागवत , सरकार्यवाह दत्तात्रेय होसबाले, सर्व सह सरकार्यवाह, अखिल भारतीय कार्यकारिणी, क्षेत्र आणि प्रांत कार्यकारिणी, संघाचे निवडून आलेले अखिल भारतीय प्रतिनिधी, सर्व विभाग प्रचारक तसेच विविध संघटनांचे निमंत्रित कार्यकर्ते सहभागी होतील .
आगामी लोकसभा निवडणुकीच्या पार्श्वभूमीवर ही बैठक महत्त्वाची असल्याचे बोलले जात आहे. यामध्ये संघाची आगामी दिशा ठरवण्याबरोबरच लोकसभा निवडणुकीचा प्रचार अजेंडाही ठरण्याची शक्यता वर्तवली जात आहे.
