नवी दिल्ली : एन्काऊंटर स्पेशालिटी हा शब्द सहसा आपण पुरुष पोलिसांसाठी असल्याचे ऐकले असेल. पण आज आम्ही तुम्हाला एका महिला पोलीस एन्काऊंटर स्पेशालिस्टची ओळख करून देणार आहोत. ज्यांनी हातात एके-४७ बंदूक घेऊन अवघ्या १५ महिन्यात तब्बल १६ दहशतवाद्यांचा खात्मा केला आहे.
आसाममधील आयपीएस अधिकाऱ्या असणारा संजुक्ता पराशर असे या धाकड महिला एन्काऊंटर स्पेशालिस्ट अधिकाऱ्याचे नाव आहे. त्यांच्या नावाचा उल्लेख करताना हिंमत, वीरता आणि साहस म्हणजे संजुक्ता पराशर असे म्हटले तरी वावगे ठरणार नाही.
संजुक्ता या सुरक्षा दलाच्या स्टार ऑफिसर असल्या तरी दहशतवाद्यांसाठी त्या कर्दनकाळ आहेत.संजुक्ता या आसामच्या दुर्गम जंगलांमध्ये एके-४७ बंदूक घेऊन आपल्या टीमसोबत गस्त घालत दहशतवाद्यांचा खात्मा करण्यासाठी ओळखल्या जातात. एका संकेतस्थळाने दिलेल्या वृत्तानुसार, संजुक्ता यांचा जन्म आसाममधलाच आहे. त्यांनी आसाममधूनच आपले शालेय शिक्षण पूर्ण केले. त्यानंतर संजुक्ता यांनी दिल्लीमधील इंद्रप्रस्थ कॉलेजमधून राज्यशास्त्र या विषयामध्ये पदवीपर्यंतचे शिक्षण घेतले.
नंतर संजुक्ता यांनी जवाहरलाल नेहरु विद्यापिठामधून आंतरराष्ट्रीय संबंध या विषयामध्ये पदव्युत्तर पदवी घेतली. संजुक्ता यांनी पदव्युत्तर शिक्षणानंतर अमेरिकन परराष्ट्र निती या विषयामध्ये एमफील आणि पीएचडीचा अभ्यास केला. संजुक्ता यांनी केंद्रीय लोकसेवा आयोगाकडून घेण्यात येणाऱ्या युपीएससीच्या परीक्षेमध्ये देशातून ८५ वा क्रमांक मिळवला.
संजुक्ता या २००६ च्या तुकडीच्या आयपीएस अधिकारी आहेत. ही परीक्षा उत्तीर्ण झाल्यानंतर संजुक्ता यांनी आपली पहिली निवड म्हणून मेघालय आणि आसाम कॅडरची निवड केली आणि सेवेत रुजू झाल्या. २००८ साली संजुक्ता यांना त्यांची पहिली पोस्टींग आसाममधील माकूम येथे सहाय्यक कमांडर म्हणून मिळाली. त्यानंतर संजुक्ता यांना बोडो आणि बंगलादेशमधील उदालगीरांमध्ये सुरु असणाऱ्या संघर्ष रोखण्यासाठी तैनात करण्यात आलेल्या तुकडीसोबत पाठवण्यात आले .
संजुक्ता यांना दहशतवादी संघटनांकडून अनेकदा जीवे मारण्याच्या धमक्याही आल्या आहेत. मात्र त्यांनी या धमक्या गांभीर्याने घेतल्या नाहीत. सध्या संजुक्ता हे नाव दहशतवाद्यांसाठी कर्दनकाळ ठरत असल्याने दहशतवादी त्यांना थोडे घाबरुनच असतात. २०१५ मध्ये संजुक्ता यांनी बोडो दहशतवाद्यांविरोधातील मोहिमेचे नेतृत्व केले होते.
तुमचा विश्वास बसणार नाही पण संजुक्ता यांनी आतापर्यंत १६ दहशतवाद्यांना ठार केले आहे.
संजुक्ता यांनी १६ दहशतवाद्यांना ठार करण्याबरोबरच शेकडो टन स्फोटकेही त्यांनी पकडून दिली आहेत आणि हे सारं त्यांनी केवळ १५ महिन्यांमध्ये केले आहे. संजुक्ता यांच्या नेतृत्वाखाली काम करणाऱ्या टीमने २०१४ मध्ये १७५ तर २०१३ मध्ये १७२ दहशतवाद्यांना अटक केली आहे.
एक उत्तम पोलीस अधिकारी असण्याबरोबरच जेव्हा जेव्हा संजुक्ता यांना मोकळा वेळ मिळतो त्या मदत छावण्यांमध्ये जाऊन गरजूंना मदत करतात.
संजुक्ता हा एखाद्या लोकल सेलिब्रिटीपेक्षा कमी नाहीत. मात्र त्याचवेळी स्थानिकांमध्ये संजुक्ता यांच्याबद्दल आदरयुक्त भीतीही आहे. संजुक्ता या सोशल नेटवर्किंगवरुन वेगवेगळे फोटो शेअर करत असतात. अनेक ठिकाणी संजुक्ता या तरुणांचा उत्साह वाढवण्यासाठी आवर्जून हजेरी लावतात. संजुक्ता या आसाममधील सोनितपूरच्या पोलीस अधीक्षक असताना त्यांनी एका मोहिमेमध्ये केंद्रीय राखीव पोलीस दलाच्या एका तुकडीचे नेतृत्व केले होते. या लढाईमध्ये संजुक्ता यांनी एके-४७ च्या मदतीने बोडो दहशतवाद्यांना चोख उत्तर दिले होते.
सध्या सोशल मीडियावर हेच फोटो व्हायरल होत आहेत. या व्हायरल फोटोंमध्ये संजुक्ता एके-४७ रायफल घेऊन त्यांच्या तुकडीसोबत चालताना दिसत आहेत. त्यांचा हा अवतार आणि रोखठोक निर्णय पाहून दहशतवाद्यांची भीतीने गाळण उडते.
संजुक्ता या ४१ वर्षांच्या असूनही अगदी फीट आहेत. त्या रोज मॉर्निंग वॉकला वगैरे तर जातातच शिवाय आपल्या सहकऱ्यांनाही त्या ठणठणीत राहण्याचे महत्व पटवून देतात. वेगवेगळ्या सामाजिक उपक्रमांसाठी आयोजित मॅरेथॉनमध्येही संजुक्ता यांनी यापूर्वी सहभाग घेतला आहे. त्या प्रचंड लोकप्रिय आहेत तरी त्या स्वत:बद्दल बोलताना “मी फार प्रेमळ आणि नम्र आहे केवळ आरोपींनीच मला घाबरलं पाहिजे,” असे चेहऱ्यावर स्मितहास्य ठेवत सांगतात.