मुंबई – ‘हरहर महादेव’ चित्रपटात इतिहासाची मोडतोड करण्यात आली आहे, असा दावा छत्रपती संभाजीराजे यांनी पुण्यात काही दिवसांपसूर्वी बोलताना केला होता. संभाजीराजे म्हणाले होते की, नव्याने प्रदर्शित करण्यात येणाऱ्या ऐतिहासिक चित्रपटांत इतिहासाची मोडतोड करण्यात येत आहे. ज्या घराण्याचे आपण नाव सांगतो, जे नाव आणि कर्तृत्व ही आपली अस्मिता आहे, त्या छत्रपती शिवाजी महाराजांच्या कार्यकर्तृत्वाचे विपर्यस्त चित्रण दाखवले तर सहन करणार नाही, असा इशारा त्यांनी यावेळी निर्माते आणि दिग्दर्शकांना दिला होता.
दरम्यान, आता लवकरच ‘हर हर महादेव’ चित्रपट झी मराठी वाहिनीवर दाखवण्यात येणार आहे. या पार्श्वभूमीवर काहीदिवसांपूर्वी संभाजीराजेंनी झी स्टुडिओला इशारा दिला होता. “हर हर महादेव’ हा वादग्रस्त चित्रपट टीव्हीवर प्रदर्शित केल्यास होणाऱ्या गंभीर परिणामांना झी स्टुडिओ जबाबदार असेल’. असं संभाजीराजेंनी म्हटलं होत. मात्र, अजूनही झी मराठी वाहिनीवर हा चित्रपट प्रदर्शित केला जाणार असल्याची जाहिरात दाखविली जात आहे.
आणि या पार्श्वभूमीवर आज स्वराज्य संघटनेचे पदाधिकारी विनोद साबळे व अंकुश कदम यांनी झी स्टुडीओमध्ये प्रत्यक्ष जाऊन व्यवस्थापनास इशारा दिलेला आहे. एका प्रसिद्ध वृत्तसंस्थेने याबद्दल माहिती दिली आहे. यावेळी त्यांनी “हर हर महादेव ह चित्रपट प्रदर्शित करणार नसल्याची लेखी हमी मागितली असून, छत्रपती संभाजीराजे यांचे पत्र व समस्त शिवभक्तांच्या भावनेकडे दुर्लक्ष करून चित्रपट टिव्हीवर प्रदर्शित केल्यास होणाऱ्या गंभीर परिणामांना व कायदा व सुव्यवस्थेचा प्रश्न निर्माण झाल्यास, त्यास झी स्टुडीओ व्यवस्थापन जबाबदार असेल’, असा इशारा देखील यावेळी देण्यात आला आहे.
संभाजीराजे नेमकं काय म्हणाले….
“हर हर महादेव हा वादग्रस्त चित्रपट टिव्हीवर प्रदर्शित केल्यास होणाऱ्या गंभीर परिणामांना झी स्टुडिओ जबाबदार असेल.
हर हर महादेव हा चित्रपट थिएटर मध्ये बंद पडल्यानंतर आता १८ डिसेंबर रोजी झी मराठी या वाहिनीवरून टीव्हीवर प्रदर्शित केला जाणार आहे.
इतिहासाचे चुकीच्या पद्धतीने सादरीकरण करण्यात आलेला व तमाम शिवभक्तांच्या भावना दुखावणारा हा चित्रपट टिव्हीवर प्रदर्शित करू नये, याबाबत स्वराज्य संघटनेने झी स्टुडीओला पत्र लिहून सूचित केले आहे. या सूचनेकडे कानाडोळा करून हर हर महादेव चित्रपट टिव्हीवर प्रदर्शित केल्यास होणाऱ्या गंभीर परिणामांना झी स्टुडिओ जबाबदार असेल…” या आशयाची पोस्ट त्यांनी शेअर केली होती.
