गुंटुर – आंध्र प्रदेशमध्ये राहणाऱ्या एका महिलेने वयाच्या ७४ व्या वर्षी २ जुळ्या मुलींना जन्म दिला आहे. ‘एरामत्ती मंगम्मा’ असे या महिलेचे नाव असून आयव्हीएफ तंत्राच्या सहाय्याने त्यांनी मुलींना जन्म दिला आहे. एरामत्ती यांचे पती राजा राव हे ८० वर्षांचे आहेत. हे दांपत्य पूर्व गोदावरी जिल्ह्यातील नीलापार्थीपाडू या गावचे रहिवासी आहेत.
कोत्तापेटमधील अहाल्या रुग्णालयात मंगम्मा यांनी जुळया मुलींना जन्म दिला. ही शस्त्रक्रिया व्यवस्थित पार पडली असून आई आणि मुली दोघांची प्रकृती उत्तम असल्याची माहिती डॉक्टरांनी दिली आहे. वय जास्त असले तरी एरामत्ती मंगम्मा यांना हायपरटेंशन, मधुमेह अशा आरोग्याच्या समस्या नसल्यामुळे प्रसुतीमध्ये कोणतीही अडचणी निर्माण झाली नाही असे डॉक्टर उमाशंकर यांनी सांगितले.
Dr Umasankar, Director of Ahalya Hospital, Guntur: She approached our hospital last year for getting a baby through IVF method. Egg from a donor & sperm from her husband, were used. She conceived in January. She delivered twin girls today, both are healthy. Mother is in ICU. https://t.co/6zBBiHR1YP
— ANI (@ANI) September 5, 2019
मंगम्मा यांच्या वयोमानामुळे मुलींसाठी मिल्क बँकमधून दुधाची व्यवस्था करण्यात येणार आहे. राजा राव हे पेशाने शेतकरी आहेत. एरामत्ती आणि राजा राव यांचा विवाह २२ मार्च १९६२ मध्ये झाला. लग्न झाल्यापासून ५७ वर्षे त्यांच्या घरामध्ये पाळणा हलला नव्हता. वेगवेगळया डॉक्टरांकडे उपचार त्यांनी केले होते. मात्र, मंगम्मा यांना गर्भधारणा होत नव्हती.
या वयातही त्यांची आई होण्याची इच्छाशक्ती पाहून आम्ही आश्चर्यचकीत झालो. आम्ही त्यांच्या वेगवेगळया चाचण्या केल्या. त्यातून आयव्हीएफद्वारे प्रसुतीसाठी त्या पूर्णपणे फिट होत्या, अशी माहिती डॉक्टर उमाशंकर यांनी यावेळी दिली.