स्थानिक गुन्हे शाखेची धडक कारवाई
पुणे – नागरिकांना बेकायदा सिलिंडर विक्री करणाऱ्या एकाला गुन्हे शाखेने सापळा रचून पकडले. गुन्हे शाखेकडून गणेश पेठेत ही कारवाई करण्यात आली. आरोपीकडून चार सिलिंडर, चार प्लॅस्टिकच्या नळ्या, टेम्पो असा 2 लाख 37 हजारांचा मुद्देमाल जप्त केला.
तुषार ज्ञानदेव चांदगुडे (वय 27, रा. सुपा, ता. बारामती, जि. पुणे) असे अटक केलेल्याचे नाव आहे. चांदगुडे एका गॅस वितरण करणाऱ्या एजन्सीत सिलिंडर वाहतुकीचे काम करत होता. चांदगुडे भरलेल्या सिलिंडरमधून नळीद्वारे गॅस चोरून तो रिकाम्या टाकीत भरायचा. चोरलेल्या गॅस सिलिंडरची विक्री तो नागरिकांना करत असल्याची माहिती गुन्हे शाखेच्या युनिट दोनला मिळाली.
त्यानंतर गुन्हे शाखेच्या पथकाने गणेश पेठेतील दारुवाला पूल परिसरात कारवाई केली. गुरूद्वारा परिसरात पार्किंगच्या मोकळ्या जागेत तो नळीद्वारे सिलिंडरमधील गॅस चोरून तो रिकाम्या टाकीत भरत असल्याचा प्रकार उघडकीस आला.
चांदगुडेला ताब्यात घेण्यात आले. त्याच्या विरोधात जीवनावश्यक वस्तू कायद्यानुसार गुन्हा दाखल करण्यात आला असून त्याला न्यायालयाने पोलीस कोठडीत ठेवण्याचे आदेश दिले. वरिष्ठ पोलीस निरीक्षक क्रांतीकुमार पाटील, उपनिरीक्षक राजेंद्र पाटोळे, किशोर वग्गू, गजानन सोनुने, चेतन गोरे, साधना ताम्हाणे या पथकाने ही कारवाई केली.