नवी दिल्ली – जागतिक टेनिस क्षेत्रातील पुरुष व महिलांची टेनिस क्रीडा स्पर्धा एकाच छताखाली आणल्या जाव्यात अशी मागणी अव्वल टेनिसपटू बिली जिन किंग, रॉजर फेडरर व राफेल नदाल यांनी केली आहे.
पुरुषांची टेनिस संघटना (एटीपी) आणि महिलांची टेनिस संघटना (डब्ल्यूटीए) या दोन्ही टेनिस संघटना एकाच छताखाली आणल्या गेल्या तर पूर्ण वर्षभर स्पर्धांचे नियोजन करणे सोपे ठरेल. गेल्या काही वर्षांत विविध महत्त्वाच्या स्पर्धांचे वेळापत्रक तयार करताना वेगवेगळे वेळापत्रक जाहीर केले जाते. त्यातून आयोजकांना स्पर्धा आयोजन करताना तसेच खेळाडूंसाठी सर्व गोष्टी व सुविधा उपलब्ध करुन देताना अनेकदा संकटांचा सामना करावा लागला आहे. यातून बोध घेत येत्या काळात या दोन्ही संघटनांचे एकत्रीकरण होणे काळाची गरज आहे, असे मत या टेनिसपटू त्रिकुटाने व्यक्त केले आहे.
या खेळाडूंच्या मागणीला अनेक देशांच्या टेनिसपटूंनी पाठिंबा दर्शवला आहे. मोठ्या स्पर्धांचे आयोजन तसेच त्यांच्या वेळापत्रकातील बदल यांबाबत माहिती देताना यापूर्वी अनेकदा गोंधळ झाल्याचेही समोर आले होते. आंतरराष्ट्रीय स्पर्धांबाबत असे होणे नामुष्किचे आहे. त्याचसाठी योग्य समन्वय साधला जावा अशी अपेक्षा आहे म्हणूनच या दोन्ही संघटना एक व्हाव्यात, असेही या खेळाडूंनी म्हटले आहे.