आज एका आरोग्य कर्मचा-याला केले दाखल
सातारा ( प्रतिनिधी) : शनिवारी रात्री उशिरापर्यंत पाच युवकांना अनुमानित म्हणून विलगीकरण कक्षात दाखल केले होते. त्यांचे ‘एनआयव्ही’कडे पाठविलेले रिपोर्ट प्राप्त झाले असून त्या पाचही युवकांचा रिपोर्ट निगेटिव्ह आलेला आहे. त्यामुळे ते कोरोना संसर्गित नाहीत, अशी माहिती जिल्हा शल्य चिकित्सक डॉ. आमोद गडीकर यांनी दिली.
बहामा, दक्षिण अमेरिका व्हाया सातारा येथे आलेला २७ वर्षीय युवक व काही वेळ त्याच्या सोबत असलेला त्याचा मित्र (वय २४ वर्षे ) त्या दोघांनाही सर्दी व खोकला असल्याने त्यांना दि. २१ मार्च रोजी रात्री ११ वा. जिल्हा रुग्णालयातील विलगीकरण कक्षात दाखल करण्यात आले होते. तसेच कतार येथून प्रवास करुन आलेला २४ वर्षीय युवक त्याला घसा खवखवत असल्याने आरोग्य कर्मचाऱ्यांनी त्याला रात्री १ वाजता विलगीकरण कक्षात दाखल केले होते. यापूर्वी चिली येथून आलेल्या २४ वर्षीय युवकास व दुबई येथून आलेल्या २९ वर्षीय युवकास दाखल करण्यात आले होते.
तथापि, आज रविवारी एका आरोग्य कर्मचाऱ्याला काही लक्षणांमुळे आज अनुमानित म्हणून विलगीकरण कक्षात दाखल करण्यात आले आहे. आजपर्यंत विलगीकरण कक्षात एकूण १० जणांना ठेवण्यात आले असून त्यातील ९ जणांचे रिपोर्ट निगेटिव्ह आले आहेत आणि आज दाखल केलेल्या आरोग्य कर्मचाऱ्याचा रिपोर्ट पुण्यातील ‘एनआयव्ही’ कडे पाठविण्यात पाठवला आहे, अशी माहितीही डॉ. गडीकर यांनी दिली आहे.