सर्वोच्च न्यायालयाचा सवाल
नवी दिल्ली: मुस्लिम पक्षकारंनी निर्मोही आखाड्याला राम लल्लाचे भक्त म्हणून मान्य केले आहे. तर मग आयोध्येतील वादग्रस्त जागेच्या बाह्य परिसराचा भाग निर्मोही आखाड्याचा ताब्यात राहणे मान्य केले जाईल का, अशी विचारणा सर्वोच्च न्यायालयाने मुस्लिम पक्षकारांना केला. सुन्नी वक्फ बोर्ड आणि मूळ याचिकाकर्ते एम. सिद्दिक यांचे वकिल राजीव धवन यांना न्यायालयाने ही विचारणा केली. निर्मोही आखाडा भाविक असल्याने ते वादग्रस्त जागेवर दावा करू शकत नाही असे मुस्लिम पक्षकारांनी न्यायालयात सांगितले होते.
जर तुम्ही निर्मोही आखाड्याला “शबैत'(भाविक) मानत असाल तर वादग्रस्त वास्तूच्या बाह्य क्षेत्राचा ताबा होता हे तुम्हाला मान्य आहे का, असे न्यायालयाने विचारले. न्यायालयाचा प्रश्नावर ऍड. धवन यांनी नकारार्थी उत्तर दिले. भाविक म्हणून हक्क असणे मान्य आहे. मात्र यामुळे न्यायिक दर्जा बदलत नाही. भाविक म्हणून निर्मोही आखाडा केवळ व्यवस्थापनाचा हक्क मागत आहे. मालमत्तेवरील हक्क मागत नाही आहे, असे ऍड. धवन यांनी सांगितले.
आखाड्याला वादग्रस्त जागेच्या बाह्य क्षेत्रात पूजा करण्याची परवानगी देण्यात आली आहे. आतील् जागेचा मालकी हक्क मागण्याची पात्रता या आखाड्याला नाही. जर बाह्य क्षेत्रातील राम चबुतरा आणि सीता रसोईची पूजा करण्याचा हक्क मान्य केला तर बाह्य क्षेत्र मशिद असू शकत नाही, असे न्यायालयाने सांगितले. त्यावर “हे प्रकरण 1885 मधील आहे. अखाडाने ‘राम चबुतरा’ येथे प्रार्थनेच्या अधिकाराची अंमलबजावणी करण्याची मागणी केली होती, मालमत्ता नावावर करून घेण्याची मागणी केली नव्हती, हा केवळ एक सोयीचा हक्क आहे, असे ऍड. धवन ते म्हणाले.