Wether Update: ऐन उन्हाळ्याच्या दिवसांत महाराष्ट्रासह अनेक ठिकाणी पावसाने हजेरी लावलेली पाहायला मिळत आहे. अवकाळी पावसामुळे मोठ्या प्रमाणात शेतीचे नुकसान होत आहे. मात्र आजही देशातील काही भागात पावसाची शक्यता आहे. महाराष्ट्रासह पंजाब, छत्तीसगड, झारखंड, उत्तराखंडमध्ये पावसाचा अंदाज व्यक्त करण्यात आला आहे. भारतीय हवामान खात्याने पुढील दोन दिवस महाराष्ट्रासह अनेक राज्यांना अवकाळी पावसाचा इशारा दिला आहे.
तर जम्मू काश्मीर आणि हिमाचल प्रदेशात पाऊस आणि बर्फवृष्टी होण्याचा अंदाज हवामान विभागाने वर्तवला आहे. आज मराठवाड्यातील काही जिल्ह्यांमध्ये वादळी वाऱ्यासह पावसाची शक्यता आहे. तर, विदर्भातील काही जिल्ह्यांमध्ये गारपीटीचा अंदाज वर्तवण्यात आला आहे. गारपिटीमुळे विदर्भात पिकांचे मोठं नुकसान झालं आहे.
कोठे बरसणार पाऊस ?
पुढील 48 तासांत मराठवाडा आणि विदर्भात पावसासह गारपीट होण्याचा अंदाज आयएमडीने वर्तवला आहे. नाशिक, बुलढाणा, जालना, हिंगोली जिल्ह्यात गारपीटीसह जोरदार पावसाची शक्यता हवामानशास्त्र विभागाने वर्तविली आहे.
धुळे, अहमदनगर, पुणे, सोलापूर, सातारा, सांगली, नाशिक आणि जळगाव जिल्ह्यांत मेघगर्जनेसह पावसाची शक्यता वर्तवण्यात आली आहे. भारतीय हवामान विभागाच्या अंदाजानुसार, रविवारी आणि सोमवारी उत्तराखंड, छत्तीसगड आणि झारखंडमध्ये गडगडाट आणि वादळी वाऱ्यासह जोरदार पावसाची शक्यता आहे.
दरम्यान, हवामान विभागाने मध्य प्रदेश, हरियाणा, जम्मू-काश्मीर, उत्तर प्रदेश, उत्तराखंड, हिमाचल प्रदेश, पंजाब आणि राजस्थानमध्ये गारपिट होण्याचा अंदाज वर्तवला असून येथे ऑरेंज अलर्ट जारी करण्यात आला आहे.