पुणे, {प्रभात वृत्तसेवा} : मनसे अध्यक्ष राज ठाकरे यांनी लोकसभा निवडणुकीत भाजपला बिनशर्त पाठिंबा दिला आहे. मात्र, पक्षाची प्रचाराबाबत काय भूमिका असेल, कार्यकर्ते कसे सहभागी होतील, हे ठरविण्यासाठी येत्या शनिवारी राज ठाकरे यांनी पक्षाच्या नेते आणि प्रमुख पदाधिकाऱ्यांची बैठक बोलावली आहे. या बैठकीनंतरच आमची भूमिका जाहीर होणार असल्याचे मनसे नेते राजेंद्र वागसकर यांनी स्पष्ट केले आहे.
अद्याप मनसेचा कोणताही पदाधिकारी महायुतीमधील कोणत्याही नेत्यांना भेटला नसल्याचा दावाही वागसकर यांनी केला आहे. गुरुवारी पुण्यात उपमुख्यमंत्री अजित पवार यांनी मनसेचे काही पदाधिकारी सकाळी आपल्याला भेटल्याचे वक्तव्य केले होते. त्यानंतर वागसकर यांनी हा दावा खोडून काढला आहे.
वागसकर म्हणाले, पक्षाच्या मेळाव्यात पक्षाध्यक्ष ठाकरे यांनी आमच्या पक्षाची भूमिका स्पष्ट केली आहे. मात्र, प्रचार तसेच इतर विषयांवर अद्याप अंतिम निर्णय झालेला नाही.
त्यासाठी येत्या शनिवारी मुंबईत पक्षाच्या नेत्यांची बैठक बोलावली असून, त्यानंतरच प्रचार तसेच इतर विषयांबाबत अंतिम निर्णय होणार आहे. तोपर्यंत कोणताही पदाधिकारी अथवा नेत्यांना इतर पक्षांच्या नेत्यांशी बोलण्याचा संबध येत नाही. त्यामुळे पवार यांना पक्षाचे कोणतेही पदाधिकारी भेटले नसल्याचा खुलासा वागसकर यांनी केला आहे.
