प्रयागराज – उमेश पाल अपहरण प्रकरणात माफिया अतिक अहमद, दिनेश पासी आणि त्यांचे वकील खान सुलत हनिफ यांना दोषी ठरवण्यात आले आहे. एमपी/एमएलए न्यायालयाने या सर्वांना जन्मठेपेची शिक्षा सुनावली आहे. यासोबतच तिघांना प्रत्येकी पाच हजारांचा दंडही ठोठावण्यात आला आहे.
दुसरीकडे, अतिकचा भाऊ अश्रफ उर्फ खालिद अझीम याच्यासह सात आरोपींची पुराव्याअभावी न्यायालयाने निर्दोष मुक्तता केली आहे. अतिक आणि अश्रफ यांना कारागृहात हजर करण्याच्या पार्श्वभूमीवर न्यायालय आणि कारागृहाबाहेर कडेकोट बंदोबस्त ठेवण्यात आला होता. दोन्ही भावांना सोमवारी दोन वेगवेगळ्या कारागृहातून प्रयागराज येथे आणण्यात आले.
तत्पूर्वी बाहुबली अतिक अहमद आणि त्याचा भाऊ खालिद अझीम उर्फ अश्रफ यांना न्यायालयात हजर करण्यात आले. वर्ष 2005 मध्ये बहुजन समाज पक्षाचे तत्कालीन आमदार राजू पाल हत्याकांडातील साक्षीदार उमेश पाल याच्या अपहरण प्रकरणी दोघांना आज हजर करण्यात आले.
वर्ष 2005 मध्ये राजू पाल यांच्या हत्येचा मुख्य साक्षीदार उमेश पाल याच्या हत्येचा कट रचल्याचा आरोपही अतिक आणि अश्रफ यांच्यावर आहे. 24 फेब्रुवारी रोजी प्रयागराजमध्ये उमेश पाल आणि त्याच्या सुरक्षेत तैनात असलेल्या दोन पोलिसांची गोळ्या झाडून हत्या करण्यात आली होती. पाल यांची पत्नी जया यांच्या तक्रारीवरून अहमद, त्याचा भाऊ अशरफ, पत्नी शाइस्ता परवीन, दोन मुले, सहकारी गुड्डू मुस्लिम आणि गुलाम आणि अन्य नऊ जणांविरुद्ध प्रयागराजच्या धुमनगंज पोलिस ठाण्यात गुन्हा दाखल करण्यात आला.
25 जानेवारी 2005 रोजी बसपा आमदार राजू पाल यांच्या हत्येनंतर तत्कालीन जिल्हा पंचायत सदस्य उमेश पाल यांनी या हत्येचा प्रत्यक्षदर्शी साक्षीदार असल्याचे पोलिसांना सांगितले होते. 28 फेब्रुवारी 2006 रोजी अतिक अहमदच्या दबावापुढे झुकण्यास नकार दिल्याने उमेशने आपले अपहरण केल्याचा आरोप केला होता. या प्रकरणी 5 जुलै 2007 रोजी अतिक, त्याचा भाऊ अश्रफ आणि चार अनोळखी व्यक्तींविरुद्ध एफआयआर दाखल करण्यात आला होता. या प्रकरणी न्यायालयात सादर करण्यात आलेल्या आरोपपत्रात 11 आरोपींचा उल्लेख आहे.
100 हून अधिक प्रकरणे –
फुलपूर येथील समाजवादी पक्षाचे (एसपी) माजी खासदार अतिक अहमद यांना जून 2019 मध्ये गुजरातच्या साबरमती मध्यवर्ती कारागृहात हलवण्यात आले होते. उत्तर प्रदेशातील तुरुंगात असताना रिअल इस्टेट बॅरन मोहित जैस्वाल यांचे अपहरण आणि प्राणघातक हल्ला केल्याचा आरोप झाल्यानंतर अतिकची साबरमती कारागृहात रवानगी करण्यात आली होती.
उमेश पाल खून प्रकरणासह 100 हून अधिक गुन्हेगारी गुन्ह्यांमध्ये अतिक अहमदचे नाव आहे. जुलै 2020 पासून बरेली जिल्हा कारागृहात बंद असलेल्या अशरफला सोमवारी संध्याकाळी कडेकोट सुरक्षा व्यवस्थेत नैनी मध्यवर्ती कारागृहात आणण्यात आले. त्याच्यासह पोलिसांचे पथक सोमवारी सकाळी बरेलीहून प्रयागराजला रवाना झाले.