लाडकी बहीण योजना; महिलांचा हिरमोड; वर्षाअखेरीस केवळ नोव्हेंबरचा हफ्ता जमा मुख्यमंत्री माझी लाडकी बहीण योजनेच्या लाभार्थ्यांच्या खात्यात बुधवारी नोव्हेंबर महिन्याचा १५०० रुपयांचा हफ्ता जमा झाला. डिसेंबरअखेर असल्याने थकीत तीन महिन्यांचे एकत्रित ४५०० रुपये मिळतील, अशी आशा महिलांना होती; मात्र प्रत्यक्षात केवळ एकच हफ्ता आल्याने अनेकींचा अपेक्षाभंग झालाय. दुसरीकडे, ३१ डिसेंबरपर्यंत ई-केवायसी (e-KYC) न केलेल्या महिलांना २०२६ पासून या लाभाला मुकावे लागण्याची शक्यता आहे. तांत्रिक कारणांमुळे ज्यांना एसएमएस आले नाहीत, त्यांनी बँक पासबुक तपासून खात्री करण्याचे आवाहन करण्यात आलेय. डिसेंबर आणि जानेवारीच्या हफ्त्यांबाबत अद्याप अनिश्चितता असल्याने लाभार्थी महिला शासनाकडून राहिलेल्या हप्त्यांबाबत स्पष्ट माहितीच्या प्रतीक्षेत आहेत. राहुल गांधींच्या रामाशी तुलनेवरून राजकारण तापले; शिंदे गटाचा काँग्रेसवर पलटवार काँग्रेस प्रदेशाध्यक्ष नाना पटोले यांनी राहुल गांधींच्या कार्याची तुलना प्रभू श्रीरामांशी केल्याने राजकीय वाद पेटलाय. “श्रीरामांप्रमाणेच राहुल गांधी शोषित आणि पीडितांना न्याय देण्याचे काम करत आहेत,” असे विधान पटोले यांनी केले. तसेच, राजीव गांधींनीच राम मंदिराचे कुलूप उघडल्याची आठवण त्यांनी करून दिली. यावर शिवसेनेच्या (शिंदे गट) संजय निरुपम यांनी तीव्र आक्षेप घेतला. “ज्या काँग्रेसने रामाच्या अस्तित्वावर प्रश्न उपस्थित केले, त्यांनी तुलना करणे हास्यास्पद आहे,” असे म्हणत त्यांनी पटोलेंचा उल्लेख ‘अटोले-पटोले’ असा केला. तसेच, मुंबईचा महापौर मराठी माणूसच ठरवेल आणि जे वंदे मातरमचा विरोध करतात त्यांनी पाकिस्तानात जावे, असा घणाघातही निरुपम यांनी यावेळी केला. 2026मध्ये पाच राज्यांत विधानसभा निवडणुका; पश्चिम बंगाल, तामिळनाडू, केरळ, आसाम, पुडुचेरी २०२५ मध्ये दिल्ली आणि बिहारमधील विजयानंतर एनडीएचा आत्मविश्वास उंचावला असतानाच, आता २०२६ चे निवडणूक वर्ष भारतीय राजकारणाची दिशा ठरवणारे असेल. यावर्षी पश्चिम बंगाल, तामिळनाडू, केरळ, आसाम आणि पुडुचेरी या ४ राज्यांसह १ केंद्रशासित प्रदेशात विधानसभा निवडणुका होणार आहेत. विशेषतः बंगालमध्ये ममता बॅनर्जी विरुद्ध भाजप असे ‘महायुद्ध’ रंगणार असून, तामिळनाडूत अण्णाद्रमुक-भाजप युतीसमोर अभिनेता विजयच्या TVK एन्ट्रीमुळे नवीन आव्हान उभे राहिलेय. केरळमध्ये एलडीएफ हॅट्रीकसाठी सज्ज आहे, तर आसाममध्ये हिमंत बिस्वा सरमा आपला किल्ला लढवत आहेत. भाजपविरोधी पक्षांची सत्ता असलेल्या राज्यांतील निकाल २०२९ च्या लोकसभा निवडणुकीसाठी ‘इंडिया’ आघाडीची ताकद निश्चित करतील. या निवडणुकांकडे देशाचे लक्ष लागलेय. प्रजासत्ताक दिन परेड 2026; तिकीट बुकिंगची प्रक्रिया सुरू नवी दिल्लीच्या कर्तव्यपथावर दरवर्षी २६ जानेवारीला आयोजित होणाऱ्या दिमाखदार प्रजासत्ताक दिन परेडची उत्सुकता आता शिगेला पोहोचलीय. भारताचे लष्करी सामर्थ्य आणि सांस्कृतिक वारसा जवळून पाहण्यासाठी अनेक नागरिक उत्सुक असतात. या परेडसाठीची तिकीट विक्री जानेवारीच्या पहिल्या आठवड्यापासून सुरू होत असते. परेडच्या ऑनलाइन तिकिटे बुकिंगसाठी नागरिकांनी ‘aamantran.mod.gov.in’ या अधिकृत संकेतस्थळाला भेट देऊन आपला मोबाईल क्रमांक आणि ओळखपत्राद्वारे नोंदणी करणे आवश्यक आहे. ऑफलाइन तिकिटांसाठी दिल्लीतील सेना भवन, शास्त्री भवन, जंतरमंतर आणि प्रगती मैदान यांसारख्या प्रमुख ठिकाणांवर विशेष काउंटर्स उभारले जातात. या तिकिटांचे दर आसन व्यवस्थेनुसार २० रुपयांपासून १०० रुपयांपर्यंत असतात. तिकीट बुक करताना आधार कार्ड, मतदार ओळखपत्र किंवा पासपोर्ट यांसारखे वैध ओळखपत्र जवळ ठेवणे अनिवार्य आहे. वेळेवर तिकीट मिळावे यासाठी संरक्षण मंत्रालयाच्या अधिकृत पोर्टलवर सातत्याने लक्ष ठेवणे गरजेचे आहे. ओला-उबरच्या मनमानीला लगाम; ‘भारत टॅक्सी’ सेवा आजपासून सुरू नवीन वर्षाच्या मुहूर्तावर देशात ‘भारत टॅक्सी’ या सरकारी पाठबळ असलेल्या नवीन कॅब सेवेचा प्रारंभ झालाय. हे ‘झिरो-कमिशन’ प्लॅटफॉर्म असून प्रवाशांनी दिलेले पूर्ण भाडे थेट चालकाला मिळणार आहे. यामुळे ओला-उबर सारख्या कंपन्यांच्या मनमानी कमिशनला लगाम बसेल आणि चालकांचे उत्पन्न वाढेल. प्रवाशांसाठी सर्वात मोठा दिलासा म्हणजे यात ‘सर्ज प्रायसिंग’ नसेल; पाऊस किंवा गर्दीच्या वेळीही जादा भाडे आकारले जाणार नाही. या सेवेअंतर्गत पहिल्या ४ किमीसाठी ३० रुपये निश्चित भाडे असेल. त्यानंतर ४ ते १२ किमीसाठी २३ रुपये आणि १२ किमीपुढील प्रवासासाठी १८ रुपये प्रति किमी दर आकारला जाईल. एसी, नॉन-एसी कॅबसह ऑटो आणि बाईक सेवाही यात उपलब्ध असून मुंबई, पुण्यासह मोठ्या शहरांतील प्रवाशांना याचा मोठा फायदा होणार आहे. 1 जानेवारीपासून नवे नियम लागू; गॅस, रेल्वे बुकिंगसह तुमच्या खिशावर परिणाम नवीन वर्षाच्या सुरुवातीलाच सर्वसामान्यांच्या जीवनाशी निगडित आठ महत्त्वाचे बदल लागू झालेत. व्यावसायिक एलपीजी सिलिंडरच्या दरात 111 रुपयांची वाढ झाल्याने हॉटेल आणि छोटे व्यावसायिक अडचणीत आलेत, मात्र घरगुती गॅसचे दर स्थिर राहिल्याने दिलासा मिळालाय. आता क्रेडिट स्कोअर दर आठवड्याला अपडेट होणार असल्याने कर्जदारांना व्यवहारांत अधिक पारदर्शकता लाभेल. इन्कम टॅक्स रिटर्न सुधारण्याची मुदत संपल्याने आता दंड भरावा लागणार आहे, तर पॅन-आधार लिंक नसलेल्यांचे पॅनकार्ड आजपासून निष्क्रिय झालेत. रेल्वे प्रवासासाठी आता आधार-व्हेरिफाईड युजर्सना तिकीट बुकिंगमध्ये विशेष प्राधान्य मिळणार आहे. यासोबतच यूपीआय व्यवहारांवरील सुरक्षा वाढवण्यात आलीय. तर आठव्या वेतन आयोगाच्या अंमलबजावणीच्या प्रतीक्षेत असलेल्या सरकारी कर्मचाऱ्यांच्या आशा पल्लवित झाल्यात. हे सर्व बदल आजपासून तुमच्या आर्थिक नियोजनावर थेट परिणाम करतील. नवीन वर्षात कार खरेदी महागणार; 7 मोठ्या कंपन्यांकडून किमतीत वाढ नवीन वर्षाची सुरुवात वाहन खरेदीदारांसाठी दरवाढीचा झटका घेऊन आलीय. १ जानेवारी २०२६ पासून भारतातील सात दिग्गज ऑटोमोबाईल कंपन्यांनी आपल्या गाड्यांच्या किमती वाढवण्याचा निर्णय घेतलाय. कच्च्या मालाचा वाढता खर्च आणि लॉजिस्टिकमधील दरवाढ यामुळे कंपन्यांनी हा भार ग्राहकांवर टाकण्याचे ठरवलेय. यामध्ये मर्सिडीज-बेंज, BMW, आणि एमजी मोटर यांनी २ टक्क्यांपर्यंत वाढ केली असून निसानने आपल्या गाड्यांच्या किमती ३ टक्क्यांनी वाढवल्यात. ह्युंदाईने ०.६ टक्के तर रेनोने २ टक्क्यांची वाढ जाहीर केलीय. होंडा आणि बीवायडी या कंपन्यांनीही दरवाढ लागू केली असून याचा थेट परिणाम मध्यमवर्गीय आणि लक्झरी अशा दोन्ही ग्राहकांच्या खिशावर होणार आहे. स्वित्झर्लंडमध्ये नवीन वर्षाच्या उत्सवात भीषण स्फोट; 40 जणांचा मृत्यू, देशात आणीबाणी घोषित नवीन वर्षाचे स्वागत करत असताना स्वित्झर्लंडमधील क्रान्स-मोंटाना स्की रिसॉर्टमध्ये एका भीषण स्फोटाने खळबळ उडालीय. येथील ‘ले कॉन्स्टेलेशन बार’मध्ये स्थानिक वेळेनुसार रात्री दीडच्या सुमारास झालेल्या या दुर्घटनेत किमान ४० पर्यटकांचा मृत्यू झाला असून १०० हून अधिक जण गंभीर जखमी झालेत. या घटनेनंतर स्वित्झर्लंड सरकारने तातडीने देशात ‘स्टेट इमर्जन्सी’ घोषित केलीय. प्राथमिक माहितीनुसार, बारमध्ये सुरू असलेल्या एका संगीत कार्यक्रमात करण्यात आलेल्या आतषबाजीमुळे हा स्फोट झाल्याचा संशय व्यक्त केला जातोय. घटनेची माहिती मिळताच १० हेलिकॉप्टर, ४० रुग्णवाहिका आणि १५० बचाव पथके घटनास्थळी दाखल झाली होती. सोशल मीडियावर या आगीचे भीषण व्हिडिओ व्हायरल होत असून पोलीस या प्रकरणाचा अधिक तपास करत आहेत. ‘इक्कीस’ची बॉक्स ऑफिसवर दमदार सलामी; पहिल्याच दिवशी प्रेक्षकांचा उत्स्फूर्त प्रतिसाद नवीन वर्षाची सुरुवात बॉलिवूडने एका प्रेरणादायी युद्धकथेने केलीय. १ जानेवारी २०२६ रोजी प्रदर्शित झालेल्या ‘इक्कीस’ या चित्रपटाने पहिल्याच दिवशी अपेक्षेपेक्षा चांगली कमाई करत बॉक्स ऑफिसवर आपली पकड मजबूत केलीय. १९७१ च्या भारत-पाक युद्धातील परमवीर चक्र विजेते अरुण खेत्रपाल यांच्या जीवनावर आधारित या चित्रपटाने प्रेक्षकांना भावूक केलेय. या चित्रपटाचे खास आकर्षण म्हणजे दिग्गज अभिनेते धर्मेंद्र यांचा हा शेवटचा चित्रपट असून, अमिताभ बच्चन यांचा नातू अगस्त्य नंदा याने यातून पदार्पण केलेय. पहिल्या दिवशी चित्रपटाने १ कोटींहून अधिकचा गल्ला जमवला असून, सकारात्मक ‘वर्ड ऑफ माउथ’मुळे येत्या दिवसांत कमाईत मोठी वाढ होण्याची शक्यता आहे. श्रीराम राघवन यांच्या संवेदनशील दिग्दर्शनाचे सर्वत्र कौतुक होतेय. टी-२० विश्वचषकासाठी ऑस्ट्रेलियाचा संघ जाहीर; ओवनला डच्चू, तर कोनोलीची सरप्राईज एन्ट्री! भारत आणि श्रीलंका येथे होणाऱ्या आयसीसी टी-२० वर्ल्ड कप २०२६ साठी ऑस्ट्रेलियन संघाची घोषणा झाली असून मिचेल मार्शकडे नेतृत्व सोपवण्यात आलेय. या संघनिवडीत सर्वात मोठा धक्का म्हणजे स्टार अष्टपैलू मिचेल ओवनला बाहेरचा रस्ता दाखवण्यात आलाय. २०२५ मध्ये तुफान फटकेबाजीमुळे चर्चेत असलेल्या ओवनला आंतरराष्ट्रीय स्तरावरील खराब फॉर्म आणि आशियाई खेळपट्ट्यांवरील अपयशामुळे स्थान गमावावे लागले. दुसरीकडे, १२ सामन्यांपासून बाहेर असलेल्या कूपर कोनोलीला अनपेक्षितपणे संघात स्थान मिळालेय. आशियाई परिस्थिती लक्षात घेऊन अॅडम झाम्पासोबत मॅट कुन्हेमन या फिरकीपटूचा समावेश करण्यात आलाय. जेवियर बार्टलेट आणि मॅथ्यू शॉर्ट यांचा हा पहिलाच विश्वचषक असेल. कमिन्स, मॅक्सवेल आणि हेड यांसारख्या अनुभवी खेळाडूंवर जेतेपदाची मदार असेल.
