Deputy Chief Minister Eknath Shinde : राज्याच्या राजकारणात महायुतीमधील अंतर्गत धुसफूसची जोरदार चर्चा आहे. नगरपरिषद आणि नगरपंचायत निवडणुकीत भाजपच्या फोडाफोडीच्या राजकारणावर शिंदेसेनेच्या नेत्यांनी टीका केली होती. त्यामुळे भाजप-शिवसेना यांच्यात वितुष्ठ निर्माण झाल्याचे बोलले जात आहे. दोन्ही पक्षांचे प्रमुख नेत्यांमध्ये दुरावा झाला आहे का? अशीही चर्चा होती. अशातच आता नागपूरातील पुस्तक प्रकाशनाच्या कार्यक्रमात उपमुख्यमंत्री एकनाथ शिंदे यांनी मुख्यमंत्री देवेंद्र फडणवीस यांचे पहिल्यांदाच जाहीरपणे तोंडभरून कौतुक केले आहे. “मुख्यमंत्री देवेंद्र फडणवीस हे सावजीसारखे तिखट आणि नागपुरी संत्र्यासारखे गोड आहेत. जराही चिडचिड न करता देवेंद्र फडणवीस अंगावर येणाऱ्या विरोधकांचा करेक्ट कार्यक्रम करतात,” असे विधान उपमुख्यमंत्री एकनाथ शिंदे यांनी मुख्यमंत्र्यांविषयी केले. त्यांनी केलेल्या या विधानाची राजकीय वर्तुळात चर्चा होत असून, सर्वांनाच आश्चर्याचा धक्का बसला आहे. गेल्या काही दिवसांपूर्वीच एकनाथ शिंदे यांनी थेट दिल्लीत जाऊन भाजप नेते केंद्रीय मंत्री अमित शाह यांची भेट घेत त्यांच्याकडे भाजपच्या फोडाफोडीच्या राजकारणावर तक्रार केल्याचे सांगितले जात होते. मात्र, मंगळवारी नागपूरातील पुस्तक प्रकाशनाच्या कार्यक्रमात एकनाथ शिंदे यांनी देवेंद्र फडणवीस यांच्यावर स्तुतीस्तुमने उधळली. “अमिताभ बच्चन हे बॉलीवूडमधील बिग बी असतील तर देवेंद्र फडणवीस बिग डी आहेत. याचा वेगळा अर्थ काढू नका असे म्हणते एकनाथ शिंदेंनी हा डी म्हणजे डिव्होशन, डेडिकेशन, डेरिंग, डिसिप्लिनचा आणि डिटरमेशनचा असल्याचे स्पष्ट केले. …म्हणून विरोधकांना हुडहुडी भरली टीका, ट्रोलिंग, टेन्शन, टोमणे सहन करण्याची त्यांची क्षमता अफाट आहे. देवेंद्रजींनी कधीही या टीकेला उत्तर दिले नाही आणि आरडाओरड किंवा आदळाआपट त्यांनी कधी केली नाही. ज्यांना उत्तर द्यायचं असेल त्यांना ते बरोबर उत्तर देतात, असेही शिंदे यावेळी बोलताना म्हणाले. राज्यात महायुती सरकाराला एक वर्ष पूर्ण झाले असून, २०२२ मध्ये घडलेल्या राजकारणावर एकनाथ शिंदेंनी भाष्य थेटपणे भाष्य न करता त्यावेळी अनेकदा ते मला हुडी घालून भेटायला यायचे. त्यांच्या या हुडीने विरोधकांना हुडहुडी भरली होती, असा टोला त्यांनी लगावला. हेही वाचा : शेअर बाजाराची स्थिर सुरुवात ; सेन्सेक्स १४४ अंकांनी वधारला तर निफ्टीने २५,८५६ चा टप्पा ओलांडला
