नवी दिल्ली : व्यस्त जीवनशैली आणि खाण्याच्या वाईट सवयींमुळे अलिकडच्या वर्षांत हृदयविकाराच्या रुग्णांमध्ये झपाट्याने वाढ होत आहे. सुमारे दशकभरापूर्वी वयाशी संबंधित आजार म्हणून ओळखले जाणारे हृदयविकार आता तरुणांमध्येही मोठ्या प्रमाणात वाढल्याचे दिसते. आरोग्य तज्ज्ञांच्या मते, वाढत्या कोलेस्टेरॉलची पातळी सर्व वयोगटातील लोकांमध्ये हृदयविकाराचा धोका वाढवत आहे. रक्तातील कोलेस्टेरॉलचे प्रमाण वाढल्याने कोरोनरी आर्टरी डिसीज, हार्टफेल, स्ट्रोक किंवा हृदयविकाराचा झटका येण्याचा धोका वाढतो. कोलेस्टेरॉलची वाढलेली पातळी रक्तवाहिन्यांमध्ये अडथळा आणते, ज्यामुळे अवयवांमध्ये रक्ताभिसरणास अडथळा निर्माण होतो.
आरोग्य तज्ज्ञांच्या मते, खाण्यापिण्याच्या सवयी बदलल्या तर हृदयविकाराचा धोका ६० टक्क्यांनी कमी होऊ शकतो. वाईट कोलेस्ट्रॉलची पातळी कमी करण्यास मदत करणाऱ्या गोष्टींचा आहारात नेहमी समावेश करा. आरोग्य तज्ज्ञांच्या मते, रोजच्या खाद्यतेलात बदल करून तुम्हाला या दिशेने बरेच फायदे मिळू शकतात. चला तर, जाणून घेऊया याविषयी सविस्तर माहिती.
* आहार कसा असावा?
आरोग्य तज्ज्ञांच्या मते, हृदय निरोगी ठेवण्यासाठी आहारातील चरबीचे प्रमाण नियंत्रित ठेवण्याकडे अधिक लक्ष दिले पाहिजे. सर्वसाधारणपणे, चरबीचे दोन प्रकार आहेत – संतृप्त आणि असंतृप्त. सॅच्युरेटेड फॅट खूप खारट किंवा खूप गोड पदार्थांमध्ये आढळते तर अनसॅच्युरेटेड फॅट नट, बिया आणि ऑलिव्ह ऑइल इत्यादींमध्ये आढळते. अनसॅच्युरेटेड फॅट्सचे सेवन आरोग्यासाठी अधिक फायदेशीर असल्याचे आरोग्य तज्ज्ञांचे मत आहे.
* ऑलिव्ह ऑइलचा वापर हृदयरोगात फायदेशीर
मेडिकल जर्नलमध्ये प्रसिद्ध झालेल्या रिपोर्टनुसार, ऑलिव्ह ऑईलचे सेवन इतर तेलांच्या तुलनेत जेवणात केले तर ते आरोग्यासाठी खूप फायदेशीर मानले जाऊ शकते. ऑलिव्ह ऑइल खराब कोलेस्टेरॉलची पातळी कमी करण्यात महत्त्वाची भूमिका बजावू शकते. हार्वर्डच्या तज्ज्ञांनी सांगितले की, ऑलिव्ह ऑईलचा आहारात वापर करणे तुमच्या आरोग्यासाठी अधिक फायदेशीर ठरू शकते.
* ऑलिव्ह ऑइलचे फायदे
आरोग्य तज्ज्ञांच्या मते, ऑलिव्ह ऑइलमध्ये 75 टक्के मोनोअनसॅच्युरेटेड फॅटी ऍसिड्स आढळतात. मोनोअनसॅच्युरेटेड फॅटी ऍसिड हे खराब कोलेस्टेरॉलची पातळी कमी करण्यासाठी प्रभावी म्हणून ओळखले जातात. याशिवाय ऑलिव्ह ऑइलमध्ये अँटीऑक्सिडंट आणि अँटी-इंफ्लेमेटरी गुणधर्म देखील आढळतात जे हृदयाला निरोगी ठेवण्यात महत्त्वाची भूमिका बजावतात. अभ्यासात असे आढळून आले आहे की ऑलिव्ह ऑइलचे सेवन केल्याने कर्करोग आणि स्मृतिभ्रंशाचा धोका देखील कमी होतो.
* ऑलिव्ह ऑइलमुळे अनेक आजारांचा धोका कमी होतो
आरोग्य तज्ज्ञांच्या मते, ऑलिव्ह ऑईलचा आहारात अनेक प्रकारे समावेश करून जास्तीत जास्त फायदे मिळू शकतात. उच्च कोलेस्ट्रॉलची पातळी कमी करण्यासाठी ऑलिव्ह ऑइलचा वापर सॅलडमध्ये किंवा अन्न शिजवण्यासाठी केला जाऊ शकतो. कर्करोग आणि यकृताचे आजार कमी करण्यासाठी ऑलिव्ह ऑइलचे सेवन फायदेशीर मानले जाते.