खासदार सुळे यांच्याकडून कात्रज-देहूरोड बाह्यवळण मार्गावरील कामाचा आढावा
नगरसेवक युवराज बेलदरे यांनी केली होती मागणी
आंबेगाव बुद्रुक – कात्रज-देहूरोड बाह्यवळण महामार्गावर असलेल्या एकमेव राजमाता भुयारी मार्गाला समांतर भुयारी मार्गाची मागणी वारंवार नगरसेवक युवराज बेलदरे करीत होते, त्यास अखेर यश मिळाले असून महामार्ग विभागाने 12 मीटर रुंद व साडेचार मीटर उंचीच्या भुयारी मार्ग कामाला मान्यता दिली आहे. या कामाचा आढावा खासदार सुप्रिया सुळे यांनी घेतला इतर अडचणींबाबत आयुक्तांशी बैठक घेणार असल्याचेही सुळे यांनी सांगितले.
कात्रज-देहूरोड बाह्यवळण महामार्गाचे सहापदरी रुंदीकरण व दोन पदरी सर्व्हिस रस्त्याचे काम राष्ट्रीय महामार्ग विभागाकडून करण्यात येत आहे. परंतु, दत्तनगर, आंबेगाव बुद्रुक, जांभुळवाडी, नऱ्हे या भागातील नागरिकांना जाण्यासाठी राजमाता भुयारी मार्ग हा एकमेव रस्ता आहे. त्यामुळे या ठिकाणी प्रचंड वाहतूक कोंडीला नागरिकांना सामोरे जावे लागत आहे. यामुळे या ठिकाणी आणखी एक समांतर भुयारी मार्ग असणे गरजेचे आहे, असे नगरसेवक बेलदरे यांनी सांगितले.
कात्रज चौक ते नवलेपूल बाह्यवळण महामार्ग मनपा हद्दीतून जातो. मात्र, वाहतूक समस्येमुळे रुंदीकरण कामाला राष्ट्रीय महामार्ग विभागाने 76 कोटी मुख्य रस्ता व इतर कामे अशी एकूण 96 कोटींच्या कामास मंजुरी दिली. मात्र, महामार्ग रुंदीकरणात येणारी 512 लहान-मोठी झाडे काढण्यासाठी प्रतिझाड दहा हजार प्रमाणे 48 लाख मनपाने भरायला सांगितले. हे काम शासकीय संस्थेचे असल्याने तसेच याबाबत तरतूद नसल्याने ती रक्कम माफ करावी. तसेच, ड्रेनेज व इतर लाइन टाकण्यासाठी महानगरपालिकेने निधी द्यावा, अशी मागणी कार्यकारी अभियंता डी. एन. देशपांडे यांनी केली.
या वेळी महिला प्रदेशाध्यक्षा रुपाली चाकणकर, नगरसेवक युवराज बेलदरे, नगरसेविका अमृता बाबर, सुधीर कोंढरे, अनिल कोंढरे, दीपक बेलदरे आदींसह कार्यकारी अभियंता डी. एन. देशपांडे, उपअभियंता श्रुती नाईक उपस्थित होते.
महामार्गाला समांतर डीपी रस्ते जोडण्याची मागणी केली आहे तसेच लाइन बदली करण्यासाठी मनपा निधीसाठी सर्वसाधारण सभेत मान्यता घेऊन उपलब्ध करून दिली जाईल. समांतर भुयारी मार्गामुळे वाहतुकीचा मोठा प्रश्न सुटणार आहे.
– युवराज बेलदरे, नगरसेवक, पुणे मनपा