भूमी अभिलेखचा सेवानिवृत्त उपसंचालक वानखेडेकडे 88 लाखांची बेहिशोबी मालमत्ता

पत्नीसह दोघांवर गुन्हा

पुणे(प्रतिनिधी) – भूमी अभिलेख विभागाचे निवृत्त उपसंचालक बाळासाहेब वानखेडे (वय 58) व त्यांच्या पत्नीच्या विरोधात बेहिशोबी मालमत्ता जमा केल्याच्या आरोपावरून मुंढवा पोलीस ठाण्यात गुन्हा दाखल करण्यात आला आहे. वानखेडे याच्याकडे 88 लाख 85 हजार रूपयांची बेहिशोबी मालमत्ता आढळून आली आहे.

वकिलामार्फत 1 कोटी 70 लाख रूपयांची लाच स्वीकारल्याच्या प्रकरणात भुमी अभिलेख विभागाचे उपसंचालक असताना बाळासाहेब वानखेडे याला अटक केली होती. त्यानंतर वानखेडेच्या मालमत्तेची उघड चौकशी केली जात होती.

या चौकशीत 1989 ते 2019 या दरम्यान वानखेडेकडे उत्पनापेक्षा 88 लाख 85 हजार रूपयांची मालमत्ता जास्त असल्याचे आढळून आले. त्यानुसार वानखडे व त्याची पत्नी उषाकिरण बाळासाहेब वानखेडे (वय 54) याच्या विरोधात मुंढवा पोलीस ठाण्यात भ्रष्टाचार प्रतिबंधक अधिनियमाच्या विविध कलमानुसार गुन्हा दाखल करण्यात आला आहे.

वानखेडे हा सध्या सेवानिवृत्त आहे. त्याच्या व कुटुंबियांच्या नावे असलेल्या पुणे शहर, मुंबई, अकोला, अमरावती या जिल्ह्यातील मालमत्ता व घरांची लाच लुचपत प्रतिबंधक विभागाकडून झडती घेण्याची प्रक्रिया सूरू आहे. पोलिस अधीक्षक राजेश बनसोडे यांच्या मार्गदर्शनाखाली सहायक पोलीस आयुक्त विजयमाला पवार या अधिक तपास करत आहेत.

डिजिटल प्रभातचे टेलिग्राम जॉईन करण्यासाठी येथे क्लिक करा

You might also like

Comments are closed.