सातारा : काल विलगीकरण कक्षात दाखल केलेल्या ” त्या ” आरोग्य कर्मचाऱ्याचा रिपोर्टही निगेटिव्ह आला आहे. कालपर्यंत अनुमानित म्हणून दाखल केलेले दहाजणही निगेटिव्ह आले आहेत. दुबई येथून आलेल्या 45 वर्षीय महिलेला खोकला असल्यामुळे रात्री उशिरा अनुमानित म्हणून जिल्हा शासकीय रुग्णालय येथे विलगीकरण कक्षात दाखल केले आहे, अशी माहिती जिल्हा शल्य चिकित्सक डॉ.आमोद गडीकर यांनी सोमवारी सकाळी दिली.
बहामा, दक्षिण अमेरिका व्हाया सातारा येथे आलेला २७ वर्षीय युवक व काही वेळ त्याच्या सोबत असलेला त्याचा मित्र वय २४ वर्षे त्या दोघांनाही सर्दी व खोकला असल्याने त्यांना दि. २१ मार्च रोजी रात्री ११ वा. जिल्हा रुग्णालयातील विलगीकरण कक्षात दाखल करण्यात आले होते. तसेच कतार येथून प्रवास करुन आलेला २४ वर्षीय युवक त्याला घसा खवखवत असल्याने आरोग्य कर्मचाऱ्यांनी त्याला रात्री १ वा. विलगीकरण कक्षात दाखल केले होते. यापूर्वी चिली येथून आलेल्या २४ वर्षीय युवकास व दुबई येथून आलेल्या २९ वर्षीय युवकास दाखल करण्यात आले होते.
काल एका आरोग्य कर्मचाऱ्याला काही लक्षणांमुळे आज अनुमानित म्हणून विलगीकरण कक्षात दाखल करण्यात आले होते. त्याचाही रिपोर्ट निगेटिव्ह आला आहे. रात्री दाखल केलेल्या या महिलेच्या घशातील स्त्रावाचा नमुना पुण्यातील ‘ एनआयव्ही’ कडे पाठवला आहे.