पुणे, {प्रभात वृत्तसेवा} – पंतप्रधान नरेंद्र मोदींच्या भारतातील सर्व जाहिराती त्वरित काढाव्यात किंवा या जाहिरातींवर काळा रंग लावून त्या अस्तित्वहीन कराव्यात, अशी कायदेशीर नोटीस अड. असीम सरोदे, डॉ. विश्वंभर चौधरी, अड. श्रीया आवले, अड. बाळकृष्ण निढाळकर, अड. रमेश तारू, अड. सुमित शिवांगी, अड. संदीप लोखंडे यांनी केंद्रीय निवडणूक आयोग तसेच राज्य निवडणूक आयुक्त यांना पाठविली आहे.
लोकसभा निवडणुकीच्या तारखा जाहीर झाल्या आहेत. आचारसंहिताही लागू झाली आहे. या पार्श्वभूमीवर सर्व सरकारी व निमसरकारी कार्यालये, रेल्वे स्टेशन्स, एअरपोर्टस, बस स्टॉपस, सगळे राष्ट्रीय व राज्य महामार्ग रस्ते, बंदरे, पेट्रोल पंप , दवाखाने, जंगले, सरकारी विश्रामगृहे, सार्वजनिक स्वच्छता गृहे, सार्वजनिक शौचालय, बसेस,
पोलीस स्टेशन्स, सगळी न्यायालये तसेच इतर सार्वजनिक ठिकाणे येथून नरेंद्र मोदी व भारतातील सगळे मुख्यमंत्री, उपमुख्यमंत्री यांची छायाचित्रे, जाहिराती त्वरित हटविण्या याव्यात, अशी मागणी नोटिसमधून करण्यात आली आहे. जनतेच्या करातून गोळा झालेले करोडो रुपये नरेंद्र मोदींनी स्वतःची प्रतिमा जाहिरातीतून प्रकाशित करण्यासाठी खर्च केले व त्या अतिशयोक्तीपूर्ण जाहिरातबाजीचा नागरिकांना उबग आला आहे. निदान निवडणूक काळात तरी भारत देश नरेंद्र मोदींच्या प्रतिमा रंजनापासून मुक्त असेल अशी अपेक्षा अड. असीम सरोदे यांनी व्यक्त केली.