पिंपरी – किवळे येथील द्वारका लॉजिंग ऍन्ड बोर्डिंगवर पोलिसांच्या सामाजिक सुरक्षा पथकाने छापा घातला. यावेळी दहा महिलांची सुटका करण्यात आली. सोमवारी ही कारवाई करण्यात आली.
मुंबई बंगलोर महामार्गावरील किवळे-देहूरोड येथील द्वारका लॉजिंग ऍन्ड बोर्डिंगमध्ये वेश्या व्यवसाय सुरू असल्याची माहिती सामाजिक सुरक्षा पथकाला मिळाली. त्यानुसार पोलिसांनी सोमवारी (दि. 6) सायंकाळी पाच वाजताच्या सुमारास या लॉजवर छापा घातला.
यावेळी एक परदेशी, सहा इतर राज्यातील आणि तीन राज्यातील अशा एकूण 10 पीडित महिलांची वेश्या व्यवसायातून सुटका केली. यावेळी पोलिसांनी आरोपीच्या ताब्यातून 11 हजार 400 रुपये रोख रक्कम, 14 हजार रुपयांचे दोन मोबाइल, 300 रुपये किमतीचे इतर साहित्य, असा एकूण 25 हजार रुपयांचा मुद्देमाल जप्त केला आहे.
गवी रंगा कृष्णा गोवडा (वय 38, रा. द्वारका लॉजिंग ऍन्ड बोर्डिंग, किवळे-देहूरोड), लॉजचा मॅनेजर रामसुख अयोध्याप्रसाद पटेल (रा. गांवदेवी रोड, बोईसर, मुंबई) यांना ताब्यात घेण्यात आले. तसेच लॉजचा मालक प्रताप शेट्टी (वय 40, रा. कात्रज, पुणे) यांच्या विरोधातही गुन्हा दाखल करण्यात आला आहे. पुढील तपास देहूरोड पोलीस स्टेशन करीत आहेत.