पुणे : गुलटेकडी मार्केट यार्डातील श्री शारदा गजाननाला रविवारी (दि. 24) 19 प्रकारच्या विविध पालेभाज्यांची आरास करण्यात आली. भव्य शारदा गजानन महालात विराजमान झालेल्या श्रींच्या मूर्तीभोवती करण्यात आलेल्या आरासमुळे उत्सव मंडपाचा गाभारा व सभामंडप हिरव्या, पांढऱ्या, लाल रंगानी सजला होता. शेतकऱ्यांनी पिकवलेल्या दर्जेदार पालेभाज्यांच्या सुमारे दहा हजार जुड्यांनी श्रींच्या मूर्तींना सजविण्यात आले होते.
भाद्रपदातील नवमीच्या सुमूहूर्तावर बाजार समितीच्या तरकारी विभागात दाखल होणाऱ्या मेथी, कोथिंबीर, शेपू, करडई, चवळई, बीट, लाल माठ, लाल मुळा, पांढरा मुळा, अंबाडी, कांदापात, पुदिना, कडिपत्ता, चुका, चाकवत, लाल राजगिरा, गवती चहा आदींमार्फत ही आरास करण्यात आली.
कोथिंबीरीच्या 75 तर अन्य पालेभाज्यांच्या 50 ते 55 जुड्यांचा वापर यामध्ये करण्यात आला. मार्केट यार्डातील पालेभाज्यांचे आडतदार राजेंद्र सूर्यवंशी यांच्या वतीने ही आरास करण्यात आली. त्यावेळी, संस्थापक अध्यक्ष गणेश घुले, कार्याध्यक्ष प्रसाद गव्हाणे, अखिल पुणे फुल बाजार अडते असोसिएशनचे अध्यक्ष अरूण वीर यांसह अन्य मान्यवर उपस्थित होते.
श्री छत्रपती शिवाजी महाराज मार्केट यार्ड मंडळाचे अध्यक्ष सागर भोसले म्हणाले, वर्षभर शेतकरी मेहनतीने शेतात राबून पालेभाज्या पिकवितो. त्याच पालेभाज्या यंदा गणेशोत्सवात मंदिरात बाप्पा चरणी अर्पण करण्यात आल्या.
तसेच, बळीराजा सुखात राहू देत, अशी प्रार्थना देखील करण्यात आली. दरम्यान, या पालेभाज्यानंतर गरजवंताना प्रसाद म्हणून देण्यात येणार असल्याचेही भोसले यांनी सांगितले.
लाडक्या शारदा गजाननाला पालेभाज्यांचा महानैवेद्य दाखविल्याचे मनोहारी दृश्य यानिमित्ताने पुणेकरांना अनुभवायला मिळाले. गणरायाचे मनोहारी रूप पाहण्याकरिता पाहण्यासोबतच हे दृश्य आपल्या मोबाईल मध्ये टिपण्याकरिता सकाळपासूनच मोठी गर्दी केली होती
