बारामती : लोकन्यायालयामध्ये पक्षकारांशी चर्चा करताना मुख्य जिल्हा न्यायाधीश जे. पी. दरेकर व जिल्हा न्यायाधीश जे. ए. शेख, सहायक सरकारी वकील ॲड. पी. टी. पांढरे.
बारामती – बारामतीचे मुख्य जिल्हा न्यायाधीश श्रीमती जे. पी. दरेकर यांच्या मार्गदर्शनाखाली झालेल्या राष्ट्रीय लोकन्यायालयामध्ये सुमारे पाच हजार पाचशे दहा खटले निकाली निघाले आहेत. सुमारे 21 कोटी रुपयांची भरपाई वसूल झाली आहे. मुख्य जिल्हा न्यायाधीश जे. पी. दरेकर, जिल्हा न्यायाधीश जे. ए. शेख, माननीय मर्चीया कोर्ट, वानखेडे कोर्ट, आटकारे कोर्ट, पाटील कोर्ट, चिकणे कोर्ट व आपटे कोर्ट यांनी प्रमुख पॅनल जज म्हणून काम पाहिले. लोक अदालत समन्वयक म्हणून मिलिंद देऊळगावकर यांनी काम पाहिले.
लोकन्यायालयामध्ये दाखल पूर्व प्रकरणांमध्ये 5203 प्रकरणे निकाली निघाली. त्यामध्ये बँकेची वसुली नगरपरिषद वसुली वीज बिल आदी तीन कोटी 78 लाख 13 हजार 355 रुपये वसूल झाले. पूर्वीची वसुलीबाबतचे खटल्यातून 303 खटले निकाली निघून 17 कोटी नऊ लाख 45 हजार 715 रुपयांची वसुली झाली. अपघात विमामध्ये एक कोटी 46 लाख 73 हजार रुपयांची वसुली झाली.
अपघाताच्या एकाच खटल्यात 50 लाखांची भरपाई
मोटर अपघात क्लेमच्या एकाच खटल्यात 50 लाख रुपयांची उच्चांकी भरपाई देण्याची तडजोड एका खटल्यात झाली. दोन वर्षांपूर्वी ॲड. जी. एम. आळंदीकर यांनी एका पक्षकाराच्या वतीने हा खटला दाखल केला होता. हा खटला चालू असताना विमा कंपनीने तडजोडीद्वारे 50 लाख रुपये देण्याचे मान्य केले. कंपनीच्या वतीने ॲड. हरीश तावरे यांनी काम पाहिले. कंपनीचे प्रशासनिक अधिकारी आनंद डोळे यावेळी उपस्थित होते. ही तडजोड मोटार अपघात न्यायाधिकरण मेंबर तथा जिल्हा न्यायाधीश जे. ए. शेख यांचे समोर झाली.
आणि ते खाली आले
लोकन्यायालयाचे महत्त्व सर्वांना समजावे लोकन्यायालयाची लोकांनी भीती बाळगू नये म्हणून या दिवशी न्यायालय डायसवर न बसता खाली खुर्चीवर पक्षकारांसमोर बसते. मात्र, आज एका खटल्यामध्ये वयस्कर पक्षकार महिलेला चालता येत नसल्याचे ॲड. आळंदीकर यांनी पॅनलचे जज जे. ए. शेख यांना सांगितले. त्यावर त्वरित शेख हे मुख्य जिल्हा न्यायाधीश जे. पी. दरेकर यांचे समवेत दोन मजले खाली उतरून स्वतः पक्षकारांजवळ गेले. त्यांच्याशी खटल्याबाबत चर्चा करून सोपस्कार पूर्ण केले. या बाबीवरून लोकन्यायालय हे लोकांसाठीच आहे, हे पुन्हा एकदा अधोरेखित झाले.