पुणे – सामाईक क्षेत्रात जनावरे चारताना पत्नीला शिवीगाळ केल्याबाबत विचारणा करण्यासाठी गेलेल्या व्यक्तीवर कुऱ्हाडने तोंडावर आणि डोक्यावर वार करून जीवे ठार मारण्याचा प्रयत्न करणाऱ्या भाऊ आणि पुतण्याला सात वर्षे सक्तमजुरी आणि प्रत्येकी 5 हजार रुपये दंडाची शिक्षा अतिरिक्त सत्र न्यायाधीश के.पी.नांदेडकर यांनी सुनावली. दंड न भरल्यास एक महिना अतिरिक्त कारावास भोगाला लागेल, असे न्यायालयाने आदेशात म्हटले आहे.
किसन सुखदेव दुर्गे (वय 61) आणि त्याचा मुलगा माधव (वय 31, दोघेही, रा. दुर्गे वस्ती, निमोणे, ता. शिरूर) अशी शिक्षा झालेल्या दोघांची नावे आहेत. बाळासो असे घटनेत जखमी झालेल्यांचे नाव आहे. त्यांची आई ताराबाई यांनी याबबत शिरूर पोलिसात फिर्याद दिली आहे.
या प्रकरणात सहायक जिल्हा सरकारी वकील मारूती वाडेकर यांनी 7 साक्षीदार तपासले. जखमी आणि त्यांची फिर्यादी आईची साक्ष महत्त्वाची ठरली. पोलीस निरीक्षक ए.बी.जगदाळे यांनी या प्रकरणाचा तपास केला. त्यांना जिल्हा न्यायालय पैरवी अधिकारी सहायक पोलीस निरीक्षक अर्जून घोडेपाटील, पुणे सत्र न्यायालय पैरवी अंमलदार सहायक पोलीस उपनिरीक्षक विद्याधर निचीत आणि न्यायालय पैरवी कर्मचारी कॉन्स्टेबल रेणूका भिसे, कॉन्स्टेबल एस.बी.रणसर यांनी न्यायालयीन कामकाजासाठी मदत केली.
2 नोव्हेंबर 2012 रोजी ही घटना घडली. 1 नोव्हेंबर 2012 रोजी सामाईक क्षेत्रात जनावरे चारताना किसन आणि बाळासो यांच्या पत्नीत शाब्दिक वाद झाले. याचा जाब विचारण्यास बाळासो गेले होते. त्यावेळी किसन त्यांना मारहाण करून लागला. तेव्हा किसनचा मुलगा माधव हा कुऱ्हाड घेऊन गेला. कुऱ्हाडीने वार करून जीवे ठार मारण्याचा प्रयत्न केल्याचे फिर्यादीत म्हटले आहे.