पिंपरी, (प्रतिनिधी) – पवना नदीकाठी उत्तर भारतीयांना छट पूजेसाठी जागा उपलब्ध करून देण्याची सूचना राज्याचे विरोधी पक्षनेते अंबादास दानवे यांनी महापालिका आयुक्त शेखर सिंह यांना केली आहे.चिंचवड येथील पवना नदीकाठी मोठ्या संख्येने उत्तर भारतीय समाज छट पूजा करू शकेल.
एवढी जागा वर्षात केवळ दोन दिवसांसाठी (प्रत्येक वर्षी नोव्हेंबरमध्ये) उपलब्ध करून द्यावी, अशी मागणी हनुमान मित्र मंडळ आणि छट पूजा समितीचे कार्याध्यक्ष विजय गुप्ता यांनी नुकतीच राज्याच्या विधानपरिषदेचे विरोधी पक्षनेते अंबादास दानवे आणि पिंपरी चिंचवड महापालिकेचे आयुक्त शेखर सिंह यांच्याकडे निवेदनाद्वारे केली आहे. त्यावर दानवे यांनी ही सूचना केली आहे.
निवेदनात त्यांनी म्हटले आहे की, पिंपरी चिंचवड शहरात अडीच लाख उत्तर भारतीय नागरिक वास्तव्य करीत आहेत. समाजाचा धार्मिक कार्यक्रम छट पूजा हा सण इंद्रायणी आणि पवना नदीकाठी गेली 30 वर्षापासून नियमितपणे दरवर्षी उत्साहात साजरा केला जातो.
पिंपरी चिंचवड महापालिकेकडून चिंचवड परिसरात पवना नदीकाठी उत्सवासाठी तात्पुरती व्यवस्था केली जाते. परंतु, जागेअभावी आणि जमणार्या असंख्य भक्तांच्या गर्दीमुळे येथील हॉटेल रिव्हरविव्ह जवळील पवना नदी घाट उत्सवासाठी अपुरा पडत आहे.
अपुर्या जागेमुळे वादविवाद होतो. शिवाय गर्दी होते. अपुर्या जागेमुळे अपघाताचीही शक्यता बळावते. या घाटाच्या अगदी उजव्या बाजूला शासनाची मोकळी पडीक जागा आहे. त्या जागेवर महापालिकेने नवा घाट विकसित करावा. शिवाय येथे नागरिकांसाठी जॉगिंग ट्रॅक आणि पर्यटन स्थळही विकसित करता येऊ शकेल.
या प्रकल्पाच्या उभारणीमुळे शहराच्या वैभवातदेखील भर पडू शकेल. त्यामुळे आपण मागणीचा विचार करून चिंचवडगावातील हॉटेल रिव्हरविव्ह जवळील पवना नदी घाटाला पर्याय म्हणून अगदी त्याच्या उजव्या बाजूला नवीन घाट उभारणीच्या कामाला त्वरित मंजुरी द्यावी, असे या निवेदनात विजय गुप्ता यांनी म्हटले आहे.