नवी दिल्ली : गुजरातमध्ये सध्या विधानसभा निवडणुकीचा प्रचार मोठ्या प्रमाणात होताना दिसून येत आहे. नुकतेच याठिकाणी पहिल्या टप्प्यातील मतदान पार पडले. दरम्यान, पंतप्रधान नरेंद्र मोदी यांनी गुजरातमधील विरोधी पक्ष काँग्रेसवर हल्लाबोल केला. यावेळी मोदींनी ‘मला शिव्या देण्यासाठी काँग्रेस नेत्यांमध्ये चढाओढ सुरू असते’, अशी टीका केली.
गुजरातमधील कालोल येथे भाजपाच्या प्रचारसभेत बोलत होते. यावेळी पंतप्रधान नरेंद्र मोदी म्हणाले, “अलीकडेच, एक काँग्रेस नेता म्हणाला मोदी कुत्र्यासारखे मरतील, दुसरा म्हणाला मोदी हिटलरसारखे मरतील. पाकिस्तानने मला मारावं, यासाठी ते वाट पाहत आहेत. ते मला रावण, राक्षस आणि झुरळ म्हणतात,” असं पीएम मोदी म्हणाले. “काँग्रेसने माझ्यावर कितीही चिखलफेक केली तरी त्यातून आणखी कमळं फुलताना दिसतील, हे काँग्रेस नेत्यांना कळत नाही” असा टोला मोदींनी लगावला. याबाबतचे वृत्त एका संकेतस्थळाने दिले आहे.
यावेळी पंतप्रधान मोदींनी काँग्रेस अध्यक्ष मल्लिकार्जुन खरगे यांच्यावर पलटवार केला. “नरेंद्र मोदी यांना रावणाप्रमाणे १०० डोकी असतील, ज्यामुळे ते निवडणुकीच्या प्रचारासाठी सर्वत्र जाण्याचा प्रयत्न करत असतील. मोदीजी पंतप्रधान आहेत. आपले कर्तव्य विसरून ते महानगरपालिकेच्या निवडणुका, आमदारकीच्या निवडणुका, खासदारकीच्या निवडणुका अशा सर्वच ठिकाणी प्रचार करत फिरतात. प्रत्येक वेळी ते स्वतःबद्दल बोलत असतात. तुम्हाला कुणाकडे बघण्याची गरज नाही, फक्त मोदींना बघा आणि मते द्या, अशी त्यांची रणनीती असते. पण आपण त्यांचाच चेहरा किती वेळा पाहायचा? त्यांची नेमकी किती रूपे आहेत? त्यांना रावणसारखी १०० डोकी आहेत का?” असा सवाल मंगळवारी खरगेंनी विचारला होता.
खरगेंच्या टीकेला उत्तर देताना मोदी म्हणाले, “ज्यांनी कधीच प्रभू श्रीरामाच्या अस्तित्वावर विश्वास ठेवला नाही. त्यांनीच आता रामायणातील रावणाशी माझी तुलना केली.”