नवी दिल्ली – भारतीय जनता पार्टीने अभिनेत्री कंगना रणावतला हिमाचल प्रदेशातील मंडी येथून लोकसभेची उमेदवारी दिली. त्यावर कॉंग्रेसच्या प्रवक्त्या सुप्रिया श्रीनेत यांनी काल सोशल मीडियावरील पोस्टद्वारे आक्षेपार्ह टिप्पणी केल्यामुळे हे प्रकरण चांगलेच तापले आहे.
श्रीनेत यांच्याकडून याबाबत खुलासा करण्यात आला असला तरी भारतीय जनता पार्टीचे नेते अमित मालवीय यांनी काही प्रश्न उपस्थित केले आहेत. राष्ट्रीय महिला आयोगानेही याबद्दल नाराजी व्यक्त करत कॉंग्रेसला सुनावले आहे.
सुप्रिया श्रीनेत यांनी मंडीतील उमेदवार कंगना रणावत यांच्यासंदर्भात केलेल्या पोस्टची आम्ही अत्यंत गंभीरपणे दखल घेतली असल्याचे राष्ट्रीय महिला आयोगाच्या अध्यक्षा रेखा शर्मा यांनी म्हटले आहे. एक महिला दुसऱ्या महिलेबद्दल अशी आक्षेपार्ह भाषा वापरते हे अत्यंत दुर्दैवी आहे. संबंधित पक्ष आणि त्या नेत्याच्या विरोधात कठोर कारवाई केली जावी असे पत्र आम्ही निवडणूक आयोगाला पाठवले आहे.
केवळ एकच नेता नाही तर दोन नेत्यांनी ट्वीटरवर एकच गोष्ट म्हटली आहे आणि नंतर आम्ही ते पोस्ट केले नाही असे त्यांचे म्हणणे आहे. त्यांनी कंगना रणावत यांची माफी मागितली पाहिजे. तुमच्या पक्षाचे बडे नेते आणि दोन्ही नेत्यांकडून चांगल्या वर्तणुकीची अपेक्षा आहे असे शर्मा यांनी म्हटले आहे.
कॉंग्रेसच्या नेत्या सोनिया गांधी या दोन्ही नेत्यांवर कारवाई करतील अशी आम्हाला अपेक्षा आहे. कंगना यांनी अत्यंत सभ्यतेने त्यांची बाजू मांडली असून उत्तर दिले आहे असेही शर्मा यांनी म्हटले आहे.