नवीन संघटनेची लवकरच स्थापना
मुंबई: मराठी नाट्य व्यावसायिक निर्माता संघात फूट पडल्याचे चित्र आहे. महेश मांजरेकर, सुनील बर्वे, लता नार्वेकर, प्रशांत दामले यांसारख्या दिग्गज निर्मात्यांनी राजीनामा देत नव्या निर्माता संघटनेची स्थापना केली आहे.
“नाट्यधर्मी निर्माता संघटना’ असे नव्या संघटनेचे नामकरण करण्यात आले असून या संघटनेची पुढील आठवड्यात घोषणा होणार आहे.
करोना काळात लॉकडाऊनमुळे अडचणीत आलेल्या नाट्य निर्मात्यांना आर्थिक मदत करण्याचा निर्णय मराठी नाट्य व्यावसायिक निर्माता संघाने घेतला होता. मात्र, ज्या 28 निर्मात्यांना आर्थिक मदत केलीगेली, त्यापैकी एकाही निर्मात्याने गेल्या 10 वर्षांत एकही नाटक रंगभूमीवर आणलेले नाही. या सरसकट मदतीवर संघटनेचे सदस्य असलेल्या अनेक निर्मात्यांचा आक्षेप होता.
नाट्य व्यावसायिक निर्मात्यांना मदत देण्यास कोणताही आक्षेप नव्हता, पण गेल्या काही वर्षांत एकही नाटक न केलेल्या व्यक्तींना बेकायदा मार्गाने पैसे देणार असाल तर त्याला पाठिंबा कसा देणार? असा सवाल प्रशांत दामले यांनी उपस्थित केला होता. त्यातूनच मराठी नाट्य व्यावसायिक निर्माता संघात फूट पडल्याचे चित्र आहे.
मराठीतील अनेक दिग्गज निर्मात्यांनी “मराठी नाट्य व्यावसायिक निर्माता संघटने’च्या सदस्यपदाचा राजीनामा देऊन वेगळी संघटना स्थापन करण्याची तयारी पूर्ण केली आहे. या संघटनेची पुढील आठवड्यात घोषणा होणार असून अध्यक्षपदी मनवनिर्माण चित्रपट सेनेचे अध्यक्ष अमेय खोपकर यांची निवड निश्चित मानली जात आहे.
दरम्यान, मराठी नाट्य व्यावसायिक निर्माता संघटनेचे अध्यक्ष अजित भुरे, उपाध्यक्ष विजय केंकरे, कोषाध्यक्ष वैजयंती आपटे यांनी यापूर्वीच राजीनामे दिले आहेत, तर प्रशांत दामले, सुनील बर्वे, लता नार्वेकर, श्रीपाद पद्माकर, नंदू कदम, राकेश सारंग, अनंत पणशीकर, चंद्रकांत लोहोकरे, महेश मांजरेकर, दिलीप जाधव यांनी नुकतेच राजीनामे दिले आहेत.