अहमदाबाद – प्रचंड भरात असलेल्या गुजरात टायटन्सच्या शुभमन गिलला रोखण्याचेच आव्हान आज येथे होत असलेल्या आयपीएल स्पर्धेच्या विजेतेपदाच्या लढतीत चेन्नई सुपर किंग्जसमोर राहणार आहे. साखळी तसेच प्लेऑफमध्ये धावांचा पाऊस पाडलेल्या गिलने यंदाच्या मोसमात जवळपास प्रत्येक विरोधी संघातील गोलंदाजांच्या मनात धडकी भरवली आहे. त्याच्यासह गुजरातच्या सगळ्याच फलंदाजांना लवकरात लवकर बाद करण्यासाठी चेन्नईचा कर्णधार महोंद्रसिंह धोनीला काही योजना तयार कराव्या लागणार आहेत.
चेन्नईने पहिल्या क्वालिफियर लढतीत गुजरातचा पराभव करत थाटात अंतिम फेरी गाठली होती. त्यानंतर एलिमिनेटर लढतीत मुंबई इंडियन्सने लखनौ सुपर जायंट्‌सचा पराभव करत दुसऱ्या क्वालिफायरमध्ये स्थान मिळवले होते. शुक्रवारी गुजरातने मुंबईचा पराभव करत अंतिम फेरीत स्थान निश्‍चित केले. आता गुजरात व चेन्नई यांच्यात यंदाच्या स्पर्धेच्या विजेतेपदासाठी मोठी चुरस रंगणार आहे.
चेन्नईने या स्पर्धेच्या इतिहासात चारवेळा विजेतेपद मिळवले असले तरीही गुजरातने गेल्या वर्षी ही स्पर्धा जिंकत पदार्पणातच करंडकावर नाव कोरले होते. इतकेच नव्हे तर यंदा सलग दुसऱ्या वर्षी ते अंतिम फेरीत दाखल झाले असून सलग दुसरे विजेतेपद मिळवण्यासाठी सज्ज बनले आहेत. मुंबईविरुद्धच्या सामन्यात गिलने अवघ्या 60 चेंडूत शतक (129) फटकावले होते. आता ऑरेंज कॅपही त्याच्याच डोक्‍यावर आहे. तो यंदाच्या मोसमात प्रचंड भरात असून त्याला लवकर बाद करण्याचे आव्हान चेन्नईच्या गोलंदाजांसमोर राहणार आहे.
दुसरीकडे चेन्नई संघाची फलंदाजी डेव्हन कॉनवे, ऋतुराज गायकवाड, शिवम दुबे, अजिंक्‍य रहाणे, अम्बाती रायडू यांच्यासह अष्टपैलू रवींद्र जडेजा याच्यावर अवलंबून आहे. कर्णधार धोनी यंदाच्या स्पर्धेत वरच्या क्रमांकावर फलंदाजीला आलेला नाही तसेच त्याला गुडघे दुखीचा त्रास होत असल्याने त्याच्याकडून मोठ्या खेलीची अपेक्षाही चेन्नईला ठेवता येणार नाही. बाकी अन्य फलंदाजांना गुजरातच्या महंमद शमी, रशीद खान, नूर अहमद व मोहित शर्मा यांच्या अफलातून भेदक गोलंदाजीसमोर मोठी धावसंख्या उभारण्यासाठी कठोर प्रयत्न करावे लागणार आहेत. चेन्नईची गोलंदाजीची बाजू काहीशी दुबळी आहे. तुषार देशपांडे बळी मिळत असला तरीही दीशाहीन गोलंदाजी जास्त करत आहे. मथिशा पथिरनाबाबतही हेच घडत आहे. त्यात दीपक चहर व रवींद्र जडेजा हेच तसे पाहायले गेले तर मुख्य गोलंदाज ठरले आहेत. गुजरातची खोलवर असलेली फलंदाजी त्यांनाच उद्‌ध्वस्त करावी लागणार आहे.
धोनीला यशस्वी फेअरवेल मिळणार का
यंदाच्या मोसमानंतर धोनी चेन्नईचे नेतृत्व सोडणार असून निवृत्तीही जाहीर करेल असे संकेत मिळत आहेत. त्यामुळे या सामन्यात विजेतेपद मिळवून त्याला थाटात फेअरवेल मिळणार का याची उत्कंठ चाहत्यांमध्ये निर्माण झाली आहे. स्वतः धोनी जरी निवृत्तीचे वृत्त नाकारत असला तरीही त्याचे वय व त्याची दुखापत पाहता तो पुढील मोसमात खेळेल असे सध्यातरी वाटत नाही.
सांगता समारंभही होणार आकर्षक
आयपीएल स्पर्धेचा सांगता समारंभही आकर्षक पद्धतीचा होणार आहे. प्रसिद्ध रॅपर किंग व डीजे न्युक्‍लिया हे या कार्यक्रमाचे मुख्य आकर्षण असतील. त्यांच्या जोडीला प्रसिद्ध गायक डिवाईन तसेच जोनिता गांधी देखील आपली कला सादर करणार आहेत. यांच्यासमवेत बॉलीवूड कलाकार तसेच विविध क्षेत्रांतील सेलेब्रीटींही उपस्थिती राहणार आहे.
लक्षवेधी
– विजेत्या संघाला मिळणार 20 कोटी
– पराभूत संघला 13 कोटी
– प्लेऑफमधील संघांनाही मोठे बक्षीस
– तिसऱ्या स्थानावरील मुंबईला 7 कोटी
– चौथ्या स्थानावरील लखनौला 6.5 कोटी
– उदयोन्मुख खेळाडूला 20 लाख
– सर्वोत्तम आक्रमक फलंदाजाला 20 लाख
– ऑरेंज कॅप 15 लाख
– पर्पल कॅप 15 लाख
– स्पर्धेतील महत्त्वाचा खेळाडू 12 लाख
– सर्वाधिक षटकार 12 लाख
– सामन्याला कलाटणी देणारा खेळाडू 12 लाख
– स्पर्धेत आतापर्यंत गिलच्या सर्वाधिक 851 धावा
– स्पर्धेत आतापर्यंत शमीचे सर्वाधिक 28 बळी
गिल विरुद्ध जडेजा द्वंद्व रंगणार
शुभमन गिलला रोखण्यासाठी धोनीने जडेजाला मुख्य अस्त्र बनवले आहे. जडेजाची डावखुरी फिरकी खेळताना गिलला अनेकदा अडचण आलेली आहे. त्यातच जडेजाचा रॉंगवन, स्ट्रेटर व आर्मबॉल अन्य फिरकी गोलंदाजांपेक्षा जास्त वेगाने येत असल्याने मुळातच बॅकफुट पंच मारण्यासाठी प्रसिद्ध असलेल्या गिलला जाळ्यात अडकवता येइल अशी धोनीची योजना राहील.
