मुंबई – सुपरमार्केटमध्ये वाईन विक्रीला परवानगी देण्याच्या निर्णयावर आज राज्य मंत्रिमंडळ बैठकीत शिक्कामोर्तब करण्यात आले असल्याचे राज्याचे अल्पसंख्याक विकास मंत्री नवाब मलिक यांनी सांगितले. हे बेवड्यांचे राज्य आहे असे म्हणणाऱ्या भाजपा पक्षातच दारु पिणारी सर्वाधिक मंडळी आहेत, अशी बोचरी टीका नवाब मलिक यांनी केली.
भाजप नेत्यांचे दारू निर्माण करण्याचे कारखाने, वाईन शॉप आहेत तसेच काही केंद्रीय मंत्री, माजी मंत्र्यांचे बार आहेत. भाजपचा दारूला इतका विरोध असेल तर त्यांनी हे परवाने परत करावेत आणि भाजप कार्यकर्त्यांनी दारू पिणार नाही अशी शपथ घ्यावी, अशी मागणी मलिक यांनी केली.
भाजपाचे खासदारच सांगतात की थोडी थोडी पिया करो, असा टोलाही मलिक यांनी लगावला. भाजपची सत्ता असलेले मध्यप्रदेश हे राज्य आता मद्यप्रदेश झाले आहे. तिथे होमबारलाही मान्यता देण्याचे काम झाले आहे, असेही मलिक म्हणाले.