मुंबई – काहीदिवसांपूर्वी राष्ट्रवादीचे नेते धनंजय मुंडे अपघातग्रस्त झाले होते. त्यानंतर त्यांना मुंबईतील ब्रिज कॅन्डी रुग्णालयात दाखल करण्यात आले होते. मात्र, नुकतंच धनंजय मुंडे यांना रुग्णालयातून डिस्चार्ज देण्यात आला. धनंजय मुंडे मतदारसंघातील कार्यक्रम आटोपून परळीकडे परतत असताना गाडीवरील ताबा सुटल्याने हा अपघात झाला होता. अपघातानंतर त्यांच्यावर मुंबईतील रुग्णालयात उपचार सुरू होते.
दरम्यान, रुग्णालयातून डिस्चार्ज मिळाल्यानंतर त्यांना डॉक्टरांनी विश्रांतीचा सल्ला दिला आहे. पण, मराठवाडा शिक्षक मतदार संघाचे उमेदवार विक्रम काळे यांच्या प्रचारार्थ परळी येथे आयोजित मेळाव्यात ऑनलाईन पद्धतीने त्यांनी कार्यकर्त्यांना मार्गदर्शन केलं. यावेळी त्यांनी “महाविकास आघाडी निवडणूक जिंकणार असून दळभद्री भाजप सरकारच्या हाती काहीच मिळणार नाही, असं म्हणत जोरदार हल्ला बोल केला.
यावेळी धनंजय मुंडे म्हणाले, “मी अपघातातून बचावलो असून, मी आता विश्रांती घेत आहे… भारतीय जनता पक्षाने एक उचल्या उमेदवार उचलून आणला आहे, हे फार दुर्दैव आहे. त्यामुळे भारतीय जनता पक्षाला 7 पिढ्या जरी गेल्या तरी विक्रम काळे यांच्या सारखा उमेदवार मिळणार नाही. येणाऱ्या काळातील मराठवाड्यातील सर्व निवडणूक ही महाविकास आघाडी जिंकणार आणि या दळभद्री भाजप सरकारला हाती काहीच मिळणार नाही.” असं विधान त्यांनी केलं आहे.
