कराड -स्व. वेणूताई चव्हाण उपजिल्हा रूग्णालयातील कोव्हिड-19 विभाग कसा सुसज्ज आहे. याची छायाचित्रासह माहिती मुख्याधिकारी यशवंत डांगे यांनी सोशल माध्यमावर प्रसारित केली होती. दैनंदिन आरोग्यविषयक कामकाजापासून वेगळा असणारा तसेच सुसज्ज बेड, व्हेंटीलेटर, स्वच्छता, डॉक्टर कक्ष आदी सुविधांनी परिपूर्ण कक्ष होता.
मात्र, प्रसुत झालेली एक महिला रूग्ण करोना पॉझिटिव्ह आढळून आली. आणि अचानकपणे कोव्हिड कक्ष व उपजिल्हा रूग्णालय धोकादायक असल्याचे चित्र तयार झाले. परंतु, येथील सुविधा व रूग्णालय कोणत्या कारणांनी धोकादायक बनले, असा प्रश्न निर्माण झाला असून सोशल मिडियातून वैद्यकीय अधिक्षक डॉ. प्रकाश शिंदे यांना टारगेट करण्यात अनेकांनी धन्यता मानली आहे.
दरम्यान, अपुऱ्या सुविधा व डॉक्टर तसेच अपुऱ्या वैद्यकीय स्टाफमुळे करोनाबाधित तसेच अनुमानित रूग्णांवर उपचार करणे अवघड होत आहे. शिवाय शहर व ग्रामीण भागातून अन्य आजारांचे रूग्ण तसेच प्रसुतीसाठीच्या महिलांचा मोठा राबता आहे. त्यामुळे करोनाचा संसर्ग वाढण्याचा धोका लक्षात घेऊन उपजिल्हा रूग्णालयाची कोव्हिड-19 चा येथील कक्ष हलवण्यात येत असल्याची माहिती समोर आली आहे.
केंद्र व राज्याच्या आरोग्य विभागाच्या मार्गदर्शक तत्वानुसार जिल्हाधिकारी शेखर सिंह, जिल्हा शल्य चिकित्सक डॉ. अमोद गडीकर, प्रांताधिकारी उत्तम दिघे, तहसीलदार अमरदीप वाकडे यांच्या मार्गदर्शनाखाली स्व. सौ. वेणूताई चव्हाण उपजिल्हा रूग्णालयात कोव्हिड-19 कक्ष उभारण्यात आला. या कक्षात काम करणारे डॉक्टर व अन्य वैद्यकीय स्टाफची स्वतंत्र नियुक्ती करण्यात आली. त्यांना आवश्यक त्या सर्व सुविधा पुरवण्यात आल्या.
मात्र, मुळात उपजिल्हा रूग्णालयात गरजेपेक्षा कितीतरी कमी वैद्यकीय कर्मचारी आहेत, याचा विचार झाला नाही. शहरी व ग्रामीण भागातून येणारे अन्य आजाराचे रूग्ण येथील ओपीडीला उपचार घेतात. तसेच शहरी व ग्रामीण भागातील आर्थिकदृष्ट्या दुर्बल असणाऱ्या गर्भवती महिला प्रसुतीसाठी प्राधान्याने उपजिल्हा रूग्णालयात दाखल होतात. तालुक्यातील बहुतांश प्राथमिक आरोग्य केंद्रात प्रसुतीसाठी अत्यावश्यक असणारी उपकरणे नसल्याने प्रसुतीसाठी उपजिल्हा रूग्णालयास प्राधान्य दिले जाते. याशिवाय लहान मुलांना गोवर, पोलिओ, धर्नुवात, ट्रीपल आदी लस देण्याचे महत्वपूर्ण काम उपजिल्हा रूणालयात ठरवून दिलेल्या दिवशी होत असते. याशिवाय तीन व पाच महिन्यानंतर असणारे लसीकरण, गरोदर मातांची तपासणी आदींसाठी रूग्णांची मोठी गर्दी असते.
नेहमी गजबजलेल्या उपजिल्हा रूग्णालयात करोनावर उपचार करण्यासाठी डॉ. प्रकाश शिंदे यांच्या नियंत्रणात कोव्हिड-19 कक्ष उभारण्यात आला. हा कक्ष आरोग्य विभागाच्या मार्गदर्शक सूचनानुसार बनवण्यात आला होता. तसेच नियमित अन्य रूग्णांवर होणारे उपचार, प्रसूतीवॉर्ड, अन्य रूग्णांचे वॉर्ड, ओपीडी यांच्या आणि कोव्हिड -19 कक्षाचा काडीमात्रही संबंध येणार नाही याची पुरेपूर दक्षताही घेण्यात आली होती. एवढेच नव्हेतर कोव्हिड रूग्णांना ये-जा करण्यासाठी स्वतंत्र मार्ग ठेवण्यात आला होता.
कराड तालुक्यातील करोना बाधितांचा वाढता आकडा आणि उपजिल्हा रूग्णालयातील वर्दळ यात नेमकी कोठे चूक झाली देव जाणे. करोना कक्षाबाबत एवढी काळजी घेतली असतानाही प्रसूती विभागातील एका महिलेस करोनाची बाधा झाल्याने करोनाचा शिरकाव कराड शहरात होण्यास उपजिल्हा रूग्णालय व डॉ. शिंदे यांचा कारभार जबाबदार असल्याचा सूर आवळण्यात आला. भरीस भर म्हणून येथील सहा आरोग्य परिचारिकांना करोनाची बाधा झाली. त्यामुळे कराड नगरपालिकेने येथील लहान मुलांचे लसीकरण रद्द केले.
शहरातील काही सामाजिक संस्था, नगरसेवक यांनी थेट जिल्हाधिकारी यांच्याकडे उपजिल्हा रूग्णालयातील कोव्हिड -19चा कक्ष रद्द करण्याची मागणी करत जन अंदोलनाचा इशारा दिला. कराड शहरात करोनाचा शिरकाव होत कामा नये, याबाबत दुमत असण्याचे कोणतेही कारण नाही. मात्र, सुमारे लाखभर लोकसंख्या असणाऱ्या शहरात कोव्हिड -19 चा कक्ष असणेही गरजेचे आहे.
जोरदार खडाजंगी
उपजिल्हा रूग्णालयात प्रसूती झालेल्या महिलेला करोनाचा संसर्ग झाला आणि कराड शहरात करोनाने प्रवेश केला. या पार्श्वभूमीवर रूग्णालयातील लहान मुलांचे लसीकरण रद्द करण्यात यावे. या मुद्यावरून मुख्याधिकारी डांगे व वैद्यकीय अधिक्षक डॉ. शिंदे यांच्यात जोरदार तूतू-मैंमैं झाल्याची चर्चा आहे. उपजिल्हा रूग्णालयाने लसीकरण प्रभागनिहाय घ्यावे यासाठी मुख्याधिकारी आग्रही होते. उपजिल्हा रूग्णालयात कोव्हिड-19 कक्ष स्वतंत्र असून लसीकरण स्वतंत्र विषय आहे. ते रूग्णालयातच होणार यासाठी डॉ. शिंदे आग्रही होते. यातून दोघात जोरदार खडाजंगी झाली. दरम्यान, हा वाद एकमेकांच्या कामात हस्तक्षेप करण्याच्या कारणावरून झाल्याचे बोलले जात आहे.