नवी दिल्ली : कोरोनाचा संसर्ग फोफावत असल्याचे पाहून अनेक राष्ट्रांनी प्रतिबंधात्मक लसींचा वापर वाढवत लसीकरण मोहिमेला वेग दिला. याच धर्तीवर आता काही राष्ट्रांनी सशर्त आंतरराष्ट्रीय प्रवासास मान्यता दिली आहे. परंतु,भारतामध्ये भारत बायोटेकने तयार केलेल्या कोवॅक्सिन या लसीचे दोन्हीही डोस घेतलेल्यांना मात्र प्रवास करता येणार नाही.
कोवॅक्सिनची लस घेतलेल्यांना आंतरराष्ट्रीय प्रवासाची मुभा न मिळण्यामागे महत्त्वाचं कारण आहे. बहुतांश देशांमध्ये त्यांच्या प्रशासनाने मान्यता दिलेल्या किंवा जागतिक आरोग्य संघटनेकडून मान्यता मिळत आपत्कालीन वापरासाठीच्या यादीत समाविष्ट करण्यात आलेल्या लसी घेतलेल्या प्रवाशांना प्राधान्य देण्यात येत आहे. पण, जागतिक आरोग्य संघटनेच्या यादीत अद्यापही कोवॅक्सिनचा समावेश करण्यात आलेला नाही. त्यामुळेच ही अडचण येत आहे.
आतापर्यंत WHO च्या यादीत सीरम इन्स्टिट्युट ऑफ इंडियाची कोविशील्ड, मॉडर्ना, फायझर, अस्ट्राझेन्का, (अमेरिका आणि नेदरलँड्समध्ये) जेन्सेन, सिनोफार्म/ बीबीआयपी अशा लसींचा समावेश करण्यात आला आहे. पण, यामध्ये कुठेही कोवॅक्सिनची वर्णी लागलेली नाही. जागतिक आरोग्य संघटनेच्या माहितीनुसार भारत बायोटेकने या यादीत आपल्या लसीचा समावेश करण्यासाठी पुढाकार घेतला आहे, पण अद्यापही काही महत्त्वाची माहिती आवश्यक असल्याचे म्हटले जात आहे.
मे महिन्याच्या अखेरीस किंवा जून महिन्यात याचसंदर्भात एक महत्त्वाची बैठक पार पडणार आहे. ज्यानंतर कंपनी जागतिक आरोग्य संघटनेकडे डोसियर देणार. प्रत्येक पायरीमध्ये काही आठवड्यांचा कालावधी लागू शकतो. त्यामुळे किमान काही आठवडे तरी कोवॅक्सिन घेतलेल्या भारतीयांच्या आंतरराष्ट्रीय प्रवासावर बंधने असणार आहेत.