बीड : बीड जिल्ह्यात युवा सेनेच्या मराठवाडा सचिवावर जीवघेणा हल्ला करण्यात आल्याने एकच खळबळ उडाली आहे. कारमधून घराकडे निघालेल्या युवासेनेचे सहसचिव (ठाकरे गट) तथा मराठवाडा सचिव असलेल्या विपुल पिंगळे यांच्यावर हा हल्ला झाला आहे. अचानक आलेल्या पाच ते सहा जणांच्या टोळक्याने पिंगळे यांच्यावर हा प्राणघातक हल्ला केला.
पोलिसांनी दिलेल्या माहितीनुसार, रविवारी सायंकाळी पिंगळे हे आपल्या कारमधून घरी जात होते. मात्र, बीड शहरातील साठे चौकापासूनच त्यांच्या गाडीचा एका पांढऱ्या रंगाच्या गाडीने पाठलाग सुरु केला. पुढे छत्रपती शिवाजी महाराज चौकातून घराकडे वळताच पाठीमागून येणाऱ्या पांढऱ्या रंगाच्या गाडीतील पाच ते सहा जणांनी त्यांची गाडी अडवली. गाडी अडवून पिंगळे यांचे चालक अविनाश पवार याला सुरवातीला मारहाण करण्यात आली. त्यानंतर डाव्या बाजूला बसलेल्या विपुल पिंगळे यांनाही बाहेर ओढत मारहाण केली. याच हल्लेखोरांमधील एकाने पिंगळे यांच्या डोक्यात पाठीमागील बाजूने दगड मारला. त्यामुळे ते रक्तबंबाळ झाले.
पिंगळे यांच्यावर भर चौकात हल्ला झाल्याने काही वेळेत लोक जमा झाल्यानंतर हल्लेखोर पुन्हा त्याच पांढऱ्या रंगाच्या गाडीतून बसून बशिरगंज भागाच्या दिशेने सुसाट वेगाने निघून गेले. त्यानंतर जखमी पिंगळे यांना चालकासह इतरांनी जिल्हा रुग्णालयात दाखल केले. रात्री उशिरापर्यंत गुन्हा दाखल झाला नव्हता. तर पोलिसांकडून जबाब घेतला जात होता.
युवासेना प्रमुख आदित्य ठाकरे यांचे कट्टर समर्थक म्हणून बाळासाहेब पिंगळे यांची ओळख आहे. यापूर्वी त्यांनी पक्षात विस्तारक म्हणून काम पाहिले होते. दरम्यान काही दिवसांपूर्वी त्यांना बढती देत बीडसह छत्रपती संभाजीनगर, जालना, हिंगोली, परभणी या जिल्ह्यांसाठी सचिव करण्यात आले होते. मागील काही वर्षात पिंगळे यांनी युवकांना पक्षात जोडण्याचे काम केले होते. राजकारणात सक्रिय असल्याने ते कायम चर्चेत असतात. दरम्यान, राजकीय वैमनस्यातूनच हा हल्ला करण्यात आला असल्याचे म्हटले जात आहे.