सातारा : सातारा जिल्हा पोलीस दलातील सध्या पोलीस मुख्यालयातील महिला अत्याचार प्रतिबंध शाखेकडे कार्यरत असलेले सहाय्यक पोलीस निरीक्षक गणेश जगन्नाथ म्हेत्रस यांना उल्लेखनीय सेवेबद्दल राष्ट्रपती पोलीस पदक स्वातंत्र्यदिनाच्या पूर्वसंध्येला जाहीर करण्यात आले आहे. राष्ट्रपती पदकाने त्यांचा दुसऱयांदा सन्मान होत असून त्यांच्यावर पोलीस दलातून अभिनंदनाचा वर्षाव होत आहे.
सहाय्यक पोलीस निरीक्षक म्हेत्रस यांची 32 वर्षे सेवा झाली असून 2008 साली त्यांना पोलीस महासंचालकांकडून सन्मान चिन्ह प्रदान करुन गौरवण्यात आले होते. तर 2006 मध्ये देखील त्यांनी पोलीस सेवेत केलेल्या उल्लेखनीय कार्याची दखल घेत त्यांना राष्ट्रपती पोलीस पदकाने सन्मानित करण्यात आले आहे. म्हेत्रस मूळचे महिमानगड, ता. माण गावचे सुपुत्र आहेत.
सध्या ते सातारा पोलीस मुख्यालयात महिला अत्याचार प्रतिबंध शाखेत कार्यरत असून त्यांनी कायदा, सुव्यवस्था, आंदोलने तसेच कोरोना प्रादुर्भावाच्या काळात केलेल्या उल्लेखनीय सेवेची दखल घेत त्यांना 2020 चे राष्ट्रपती पोलीस पदक जाहीर करण्यात आले आहे. स्वातंत्र्यदिनी जिल्हा पोलीस दलाला मिळालेली ही खास भेट असून लवकरच राज्यपालांच्या हस्ते खास समारंभात त्यांना हे पदक प्रदान करुन सन्मानित करण्यात येणार आहे.
याबद्दल त्यांचा सातारा जिल्हा पोलीस अधिक्षक तेजस्वी सातपुते, अपर जिल्हा पोलीस अधिक्षक धीरज पाटील यांच्यासह पोलीस दलातील अधिकारी व कर्मचाऱयांनी अभिनंदन केले आहे.