मुंबई – मुंबईतील करोनाच्या परिस्थिती बिकट झाल्याच्या पार्श्वभूमीवर गतवर्षी मे महिन्यात तत्कालीन मुंबई पालिका आयुक्त प्रवीणसिंह परदेशी यांची तडकाफडकी बदली करण्यात आली होती. त्यांच्या जागी इकबाल सिंह चहल यांच्याकडे मुंबई पालिका आयुक्तपदाची जबाबदारी सोपवण्यात आली.
आता प्रविणसिंह परदेशी यांना मंत्रालयातील मराठी भाषा विभागाच अतिरिक्त मुख्य सचिव पदावर नियुक्ती देण्यात आली आहे. प्रवीणसिंह परदेशी यांच्यासोबतच राज्यातील इतर 6 अधिकाऱ्यांची बदली करण्यात आली आहे.
या संदर्भातील यादी राज्य सरकारकडून जाहीर करण्यात आली आहे. यात रणजित कुमार (2008) यांची मंत्रालयातील आयटी विभागाच्या संचालक पदावरून मुख्य सचिव कार्यालयात सहसचिव पदावर बदली करण्यात आली आहे. तसेच व्ही. पी. फड (2011) यांची उस्मानाबादच्या सीईओ पदावरून मराठवाडा स्टॅच्युटरी डेव्हलपमेंट बोर्डाच्या सदस्य सचिव पदावर बदली करण्यात आली आहे.
पंकज आशिया (2016) यांची बदली जळगाव जिल्हा परिषदेच्या सीईओपदी बदली करण्यात आली आहे. त्या भिवंडी-निजामपूर महानगर पालिकेच्या आयुक्तपदावर कार्यरत होत्या. राहुल गुप्ता (2017) यांची गडचिरोली अहेरीतल्या आयटीडीपीचे प्रकल्प अधिकारी आणि सहय्यक जिल्हाधिकारी यांची उस्मानाबाद जिल्हा परिषदेच्या सीईओ पदावर बदली करण्यात आली आहे.
तर मंनुज जिंदाल (2017) गडचिरोली भामरागडच्या आयटीडीपीचे प्रकल्प अधिकारी आणि अटापल्ली सबडिव्हिजनचे सहाय्यक जिल्हाधिकारी मनुज जिंदाल यांची जालना जिल्हा परिषदेचे सीईओ, तर मिताली सेठी (2017) यांची चंद्रपूर जिल्हा परिषदेच्या सीईओ पदावर बदली करण्यात आली आहे.