चंद्रपूर – चंद्रपुर जिल्ह्यातील सावली तालुक्यातल्या सामदा गावाजवळील आज सकाळी एक वाघ मृतावस्थेत आढळून आल्याने एकच खळबळ उडाली आहे. गोसेखुर्द कालव्याच्या बाजूला असलेल्या शेतात हा मृत वाघ आढळल्यानंतर वनपथक घटनास्थळी दाखल झाले असून वाघाच्या मृत्यूबाबत तपास सुरू करण्यात आला.
गेल्या पाच दिवसांत तीन वाघांचा मृत्यू झाल्याने वन्यजीव प्रेमींनी चिंता व्यक्त केली असून वन विभागाच्या कार्यक्षमतेवर प्रश्नचिन्ह उपस्थित केले जात आहे. चंद्रपूर जिल्ह्यात काल 24 डिसेंबरलांच शिकारीच्या शोधात असताना विहीरीत पडून एका वाघाचा मृत्यू झाला होता. नागभीड तालुक्यातील गोविंदपूर शेत शिवारातील ही घटना घडली.
मृत वाघ नर असून अंदाजे दीड वर्ष त्याचं वय आहे. धक्कादायक म्हणजे या गावाला सरकारकडून वन्यजीवांच्या संरक्षणासाठी 25 लाखांचे अनुदान मिळाले आहे. चंद्रपूर जिल्ह्यात शिकारी करिता लावलेल्या विद्युत प्रवाहाचा करंट लागून गुरूवार, 21 डिसेंबरला एका वाघाचा मृत्यू झाला. ब्रम्हपुरी वनविभागांतर्गत येणार्या सिंदेवाही वनपरिक्षेत्रातील डोंगरगाव बिट मधल्या मेंढामाल शेतशिवारातील ही घटना आहे.
त्यानंतर 24 डिसेंबर रविवारी ब्रम्हपुरी वनविभाग अंतर्गत येणाऱ्या तळोधी बाळापूर वनपरिक्षेत्रातील गोविदपुर येथे मुमताज अहमद नुराणी यांच्या शेतातील विहिरीत पडून वाघाचा मृत्यू झाला. ही घटना रविवारी दुपारच्या सुमारास उघडकीस आली. या घटनेला अवघे काही तास उलटून जात नाही तर आता पुन्हा सावली तालुक्यातल्या सामदा गावाजवळील एक वाघ मृतावस्थेत आढळून आला आहे.
