Amol Mitkari on Bavankule, Padalkar – राज्याचे कृषिमंत्री अब्दुल सत्तार यांनी आज बारामतीत भरवण्यात आलेल्या कृषिप्रदर्शनाला भेट दिली. यावेळी सत्तार यांनी, पवार कुटुंबियांचे तोंडभरून कौतुक केले. पवारांची पावर अशीच कायम रहावी अशी प्रार्थनाही त्यांनी यावेळी केली. दरम्यान, सत्तार यांनी पवारांचे तोंडभरून कौतुक केल्यानंतर आता याबाबत राजकीय वर्तुळातून प्रतिक्रिया उमटू लागल्या आहेत. राष्ट्रवादी काँग्रेसचे विधान परिषद आमदार अमोल मिटकरी यांनी, पवारांवर सातत्याने टीका करणाऱ्या सत्तारांमध्ये झालेल्या या परिवर्तनाचे स्वागत केले आहे. सोबतच यावरून भाजपचे प्रदेशाध्यक्ष चंद्रशेखर बावनकुळे व विधान परिषद आमदार गोपीचंद पडळकर यांनी कोपरखळी देखील मारली आहे.
नेमकं काय म्हणाले मिटकरी?
मंत्री अब्दुल सत्तर यांनी पवार कुटुंबाची प्रशंसा केल्यानंतर मिटकरी यांनी एक ट्विट केल आहे. “बारामतीवर उठसुठ तोंडसुख घेणारे प्रत्यक्ष बारामतीत गेल्यानंतर बारामतीच्या प्रेमात पडतात हे अब्दुल सत्तारांच्या आजच्या दौऱ्यावरून परत सिद्ध झाले. डिपॉझिट जप्त झालेल्यांनी व घड्याळ बंद पाडण्याचे स्वप्न पाहणाऱ्यांनी अब्दुल सत्तारांचा बारामती बद्दल बदललेला दृष्टिकोन अंगीकारावा.” असं मिटकरी यांनी म्हंटलंय.
दरम्यान, मिटकरी यांनी ट्विटमध्ये कोणाचंही नाव घेतलं नसलं तरी त्यांनी ‘डिपॉझिट जप्त झालेल्यांनी’ असा उल्लेख करत गोपीचंद पडळकर यांना टोला लगावला आहे. पडळकर यांनी २०१९ विधानसभा निवडणूक भाजपच्या चिन्हावर बारामती येथून लढवली होती. यामध्ये अजित पवार यांचा प्रचण्ड बहुमताने विजय झाल्याने पाडळकरांचे डिपॉझिट जप्त झाले होते.
तर मिटकरी यांनी ट्विटमध्ये पुढे भाजप प्रदेशाध्यक्ष बावनकुळे यांच्या घड्याळ बंद पाडण्याचा दाखला नाव न घेता दिला आहे. मिटकरी यांनी पडळकर व बावनकुळे या दोन्ही भाजप नेत्यांना ‘अब्दुल सत्तारांचा बारामती बद्दल बदललेला दृष्टिकोन अंगीकारावा’ असा सल्लाही ट्विटद्वारे दिला आहे.
बारामतीवर उठसुठ तोंडसुख घेणारे प्रत्यक्ष बारामतीत गेल्यानंतर बारामतीच्या प्रेमात पडतात हे अब्दुल सत्तारांच्या आजच्या दौऱ्यावरून परत सिद्ध झाले. डिपॉझिट जप्त झालेल्यांनी व घड्याळ बंद पाडण्याचे स्वप्न पाहणाऱ्यांनी अब्दुल सत्तारांचा बारामती बद्दल बदललेला दृष्टिकोन अंगीकारावा.
— आ. अमोल रामकृष्ण मिटकरी (@amolmitkari22) January 19, 2023
