बेंगळूरु : “भगवान देता है तो छप्पर फाड के देता है’ असे म्हटले जाते. त्याचा अनुभव बेंगळूरुमधील एका फुले विक्रेत्याने घेतला आहे. त्याच्या खात्यावर अचानक थोडेथोडके नव्हे, तर तब्बल 30 कोटी रुपये जमा झाले आहेत.
वैद्यकीय कारणासाठी पैशांची नितांत आवश्यकता असतानाच या फुले विक्रेत्याच्या खात्यावर हे घबाड जम झाले आहे. आता त्याच्या खात्यावर एवढे पैसे नेमके कोठून जमा झाले आहेत, याची चौकशी बॅंकेचे अधिकारी करायला लागले आहेत.
सईद मलिक बुऱ्हाण असे या फुले विक्रेत्याचे नाव असून तो कर्नाटकातील चन्नापटना गावातील रहिवासी आहे. 2 डिसेंबरला बॅंकेचे अधिकारी बुरहानचे घर शोधत आले. सईदची पत्नी रेहानाच्या खात्यावर अचानक खूप मोठी रक्कम जमा झाली आहे. त्यासंदर्भात पत्नीला आधार कार्ड घेऊन बॅंकेत घेऊन यावे, असे त्यांनी बुरहानला सांगितले. बॅंकेच्या अधिकाऱ्यांनी काही कागदपत्रांवर बुरहानच्या स्वाक्षऱ्या घेण्यासाठी दबावही आनायला सुरुवता केली. मात्र मात्र बुरहानने त्यास साफ नकार दिला.
ऑनलाईन पोर्टलवरुन त्यांनी साडी खरेदी केल्याचे बुरहानला आठवले. त्यानंतर त्याच्या बॅंकेचा तपशील मागवणारा फोन आला होता. त्याला लॉटरीमध्ये कार मिळाली असून त्यासाठी हा तपशील आवश्यक असल्याचे त्याला सांगितले गेले होते. त्याने हा तपशील दिलाही होता. तेंव्हापासून हे पैसे आपल्या खात्यात कोठून जमा झाले, हे शोधण्यासाठी त्याची धावपळ सुरू आहे.
ही रक्कम जमा होण्यापूर्वी त्याच्या खात्यात केवळ 60 रुपये होते. मात्र अचानक एवढी रक्कम जमा झाल्याने त्याला काहीच समजेनासे झाले आहे. बुरहानने आयकर विभागाकडे तक्रार केली आहे, मात्र या प्रकरणाच्या तपासात “इन्कम टॅक्स’वाल्यांनी सुरुवातीला काहीच स्वारस्य दाखवले नसल्याचेही त्याने सांगितले.
बुरहानने केलेल्या तक्रारीच्या आधारे रामानगरा जिल्ह्यातील चन्नापटना पोलिसांनी 9 जानेवारी रोजी बनावट आणि तोतयागिरीचे प्रकरण दाखल करून घेतले आहे. याबरोबरच फसवणूकीसाठी माहिती तंत्रज्ञान कायद्याखालीही प्रकरण दाखल केले गेले आहे. बरेच आर्थिक व्यवहार असे असावेत ज्याबद्दल बुरहानला माहिती नसावी, असे पोलिसांचे म्हणणे आहे.