अहमदाबाद – आयपीएल स्पर्धेच्या यंदाच्या मोसमात सातत्यपूर्ण कामगिरी केलेल्या जोस बटलरची विकेट पडली आणि राजस्थान रॉयल्सच्या डावाची घसरगुंडी उडाली. गुजरातचा कर्णधार हार्दीक पंड्यासह अन्य गोलंदाजांनी केलेल्या भेदक माऱ्यासमोर राजस्थानचा डाव 20 षटकांत 9 बाद 130 अशा साधारण धावसंख्येवर रोखला गेला.
देशातील सर्वात जास्त प्रेक्षकक्षमता असलेल्या या मैदानावर तब्बल 1 लाख 32 हजार प्रेक्षक उपस्थित होते. मात्र, स्पर्धेत सातत्याने धावा करणारे राजस्थानचे फलंदाज शरणागती पत्कराता दिसले. राजस्थानचा कर्णधार संजू सॅमसन याने नाणेफेक जिंकत पहिल्यांदा फलंदाजी करण्याचा घेतलेला निर्णय साफ चुकीचा ठरला.
खरेतर त्यांच्या डावाची सुरुवात बटलर व यशस्वी जयस्वालने थाटात केली होती. मात्र, जयस्वाल 16 चेंडूत 2 चौकार व 1 षटकार यांच्या मदतीने 22 धावांवर परतला. तसेच यंदाच्या स्पर्धेत चार शतके व चार अर्धशतके फटकावताना 800 पेक्षा जास्त धावा करणारा पर्पलकॅचा मानकरी बटलर या सामन्यात मोठी खेळी करु शकला नाही व इथेच राजस्थानच्या डावाला खिंडार पडले.
बटलर 39 धावा करुन बाद झाला. त्याने या खेळीत 35 चेंडूत 5 चौकार फटकावले. तो बाद झाल्यावर मात्र, रियान पराग 15, कर्णधार सॅमसन 14, शेमरन हेटमायर व ट्रेन्ट बोल्ट प्रत्येकी 11 धावा करुन बाद झाले. गुजरातचा कर्णधार पंड्याने सर्वाधिक 3 गडी बाद केले. त्यातही त्याने यंदाच्या स्पर्धेत तुफान भरात असलेल्या बटलरला बाद करत संघाच्या मार्गातील सर्वात मोठा अडसर दूर केला. त्याला साथ देताना श्रीनीवासन साई किशोरने 2 गडी बाद केले. रशिद खान, यश दयाळ व महंमद शमी यांनी प्रत्येकी 1 बळी घेतला.
संक्षिप्त धावफलक – राजस्थान रॉयल्स – 20 षटकांत 9 बाद 130 धावा. (जोस बटलर 39, यशस्वी जयस्वाल 22, रियान पराग 15, कर्णधार सॅमसन 14, शेमरन हेटमायर 11, ट्रेन्ट बोल्ट 11, हार्दीक पंड्या 3-17, श्रीनीवासन साई किशोर 2-20, रशिद खान 1-18, यश दयाळ 1-18, महंमद शमी 1-33).