जुन्नर : कोरोना काळात माणुसकीचा झरा आटत चालला असल्याचे म्हटले जाते आणि त्याला कारणही तसेच होते. कोरोना महामारीच्या काळामध्ये कोरोनाबाधित व्यक्तीला अनेक अडचणींना सामोरे जावे लागते, त्याकडे अजूनही काही ठिकाणी वेगळ्या नजरेतून पाहिले जाते. त्यातच कोविड सेंटरला ऍडमिट होण्यासाठी शासकीय अंबुलन्स सेवा मिळाली नाही तर पाहुण्यांकडे अथवा मित्रांकडे वाहन मागावे लागत असे.
परंतु कोरोनाबाबत असलेल्या समज गैरसमजा मुळे नातेवाईक आणि मित्र त्या रुग्णाला वाहन नाकारतात. त्यामुळे मनस्तापसोबतच परिचयातील व्यक्तींकडून मिळालेल्या वागणुकीमुळे सदर रुग्णाला मानसिक धक्का सुद्धा बसत असायचा. परंतु शिवजन्मभूमितील युवक ऐनवेळी रुग्णवाहिका उपलब्ध न होणाऱ्या जुन्नर तालुक्यातील कोरोनाबाधितांना आपल्या चारचाकी गाडीतून रुग्णालयापर्यंत पोहचवत आहेत.त्यामुळे अनेकांना वेळीच औषधोपचार मिळाल्याने त्यांचे प्राण देखील वाचले आहेत. पॉझिटिव्ह आलेल्या रुग्णाला अश्यावेळी जवळचे नातेवाईक किंवा मित्रमंडळी गाडी नाकारताना दिसत असताना हे युवक करत असलेल्या मदतीबद्दल तालुक्यातुन कौतुक होत आहे.
निलेश चव्हाण यांनी जुन्नर शहर, धालेवाडी, सावरगाव, वडज, पारुंडे व परिसरातील बाधितांसाठी आपले वाहन उपलब्ध करून दिले आहेत. तर श्रीकांत जाधव यांनी जुन्नर परिसरातील रुग्णांसाठी ही सेवा देऊ केली आहे. तसेच जुन्नरच्या पश्चिमेकडील निरगुडे, आपटाळे, बेलसर, सुराळे, बोतार्डे या गावांतील बाधितांसाठी कमलेश वंडेकर या तरुणानेही स्वतःचे वाहन उपलब्ध करून दिले आहे.
यासाठी कोणत्याही प्रकारचे शुल्क रुग्णांकडून आकारले जात नसून विशेष म्हणजे हे युवक स्वतःच या गाडीचे सारथ्य करत असून रुग्णांना इच्छितस्थळी पोहचवत आहेत.त्याचप्रमाणे राष्ट्रवादी युवक काँग्रेस चे अध्यक्ष सूरज वाजगे यांनी देखील त्यांचे वाहन कोरोना रुग्णांच्या सेवेकरिता २४ तास उपलब्ध करून दिले आहे
