नवी दिल्ली : भारतातील करोना प्रतिबंधक लसीचे ९० टक्के उत्पादन करणाऱ्या सीरम कंपनीचे प्रमुख अदर पुनावाला यांनी नेत्यांच्या आणि शक्तीशाली लोकांच्या धमक्यांमुळे भारत देश सोडून लंडन गाठल्याचं समजतंय. भारत देशासाठी ही लाजिवाणी गोष्ट मानली जात असून देश नेमका कुठं चाललाय असा प्रश्न उपस्थित होत आहे.
मिळालेल्या धमक्यांमुळे आगामी काळात भारताबाहेर ब्रिटनमध्ये करोना लसीचं उत्पादन करण्याबाबत सूचक इशारा पूनावाला यांनी दिला. ते आंतरराष्ट्रीय मॅगेझिन टाईम्सला दिलेल्या मुलाखतीत बोलत होते. पुनावाला जगातील सर्वात मोठे करोना प्रतिबंधक लस उत्पादक आहेत.
अदर पुनावाला म्हणाले, “भारतातील सर्वात श्रीमंत आणि शक्तीशाली लोकांपैकी काही जणांकडून धमक्या येत आहेत. यात काही राज्यांचे मुख्यमंत्री, काही उद्योग समूहांच्या प्रमुखांचा समावेश आहे. हे सर्व सीरमच्या एस्ट्रा झेनेका म्हणजेच कोविशिल्ड लसीचा तातडीने पुरवठा मागत आहेत. त्यांच्या बोलण्याला धमकी म्हणणंही कमी ठरेल. आक्रमकपणा आणि अपेक्षांचा स्तर अभूतपूर्व आहे, असंही ते म्हणाले.
India’s vaccines supremo hints that he may start producing in Britain and tells Martin Fletcher about threatening calls from the rich and powerful https://t.co/KaHsKfy6gS
— The Times (@thetimes) May 1, 2021
सध्या अदर पुनावाला हे लंडनमध्ये आहेत. त्यांनी पुढे बोलताना सांगितलं की, मी आणखी काही दिवस लंडन मध्येच राहणार असून, अशा परिस्थितीत भारतात येणे मला योग्य वाटत नसल्याचे त्यांनी म्हटले आहे. लस निर्मितीचे सर्व ओझे माझ्या खांद्यावर टाकलं आहे, मात्र मी एकटा हे पूर्ण करू शकत नसल्याचे त्यांनी म्हटले आहे.
तत्पूर्वी, अदर पुनावाला यांना सातत्याने मिळत असलेल्या धमक्यांच्या पार्श्वभूमीवर केंद्र सरकारने दोन दिवसांपूर्वीच त्यांना वाय सुरक्षा व्यवस्था देण्याची घोषणा केली होती. त्यांना संपूर्ण भारतात सीआरपीएफच्या (CRPF) जवानांकडून सुरक्षा पुरवली जाणार होती.