नाशिक – नाशिकचे पोलीस आयुक्त विश्वास नांगरे-पाटील यांना लवकरच बढती मिळणार असल्याची चर्चा सुरू आहे. आयपीएस विश्वास नांगरे पाटील यांची मुंबईत बदली होणार असल्याची माहिती सूत्रांनी दिली आहे. नांगरे-पाटलांच्या बदलीची अद्याप अधिकृत माहिती नसली, तरी कार्यकाळ संपल्याने त्यांच्या बदलीची चर्चा आहे.
डॅशिंग अधिकारी म्हणून नांगरे-पाटील यांची ओळख आहे. नाशिकचे पालकमंत्री छगन भुजबळ यांनीही नांगरे-पाटील यांच्या बदलीचे संकेत दिले. मात्र अधिकृत अशी कोणतीही घोषणा अद्याप झालेली नाही. विश्वास नांगरे-पाटील यांची फेब्रुवारी 2019 मध्ये नाशिकच्या पोलीस आयुक्तपदी नियुक्ती झाली होती. नाशिकचे तत्कालीन पोलीस आयुक्त रवींद्र सिंघल यांच्या जागी त्यांची नियुक्ती झाली होती. त्यापूर्वी ते कोल्हापूर परिक्षेत्राचे महानिरीक्षक म्हणून कार्यरत होते.
नांगरे-पाटील यांनी पदभार स्वीकारल्यानंतर नाशिकमधील कायदा-सुव्यवस्थेला आकार देण्याचा प्रयत्न केला. नाशिकमध्ये करोनाचं मोठं संकट असतानाही, कायदा सुव्यवस्था राखण्यात नांगरे-पाटील यशस्वी ठरले. त्यामुळे त्यांच्या बदलीला स्थगिती मिळते की त्यांना पदोन्नती मिळून मुंबईत त्यांची सहआयुक्तपदी बदली होते याबद्दल अनेक चर्चा सुरू आहेत.
दरम्यान, महाराष्ट्रातील तरुणांच्या गळ्यातील ताईत असलेले आणि पोलीस सेवेत धडाडीचे आयपीएस अधिकारी म्हणून परिचित असलेले विश्वास नांगरे पाटील हे मूळचे सांगली जिल्ह्यातील आहेत. शिराळा तालुक्यातील कोकरूड हे त्यांचे मूळ गाव. त्यांचा आयपीएस बनण्यापर्यंतचा प्रवास खडतर होता. म्हणून आजही त्यांच्याकडे अनेक तरुण प्रेरणादायी व्यक्तिमत्त्व म्हणून पाहतात. स्पर्धा परीक्षा करून पोलीस सेवेत येऊ पाहणाऱ्यांचे विश्वास नांगरे-पाटील हे रोल मॉडेल आहेत.