नवी दिल्ली – झारखंडमधील सत्ताधारीपक्षाच्या आमदारांची भाजपकडून शिकार होऊ नये म्हणून त्यांच्यासाठी येथे अत्यंत कडेकोट व्यवस्था करण्यात आली आहे. या आमदारांना विशेष विमानांनी हैदराबाद मध्ये आणण्यात आले आहे.
येथील एका रिसॉर्टमध्ये या आमदारांसाठी स्वतंत्र जेवणाची व्यवस्था, खोल्यांचे रक्षण करण्यासाठी पोलिस कर्मचारी आणि इतर अनेक व्यवस्था ठेवण्यात आल्या आहेत, अशी माहिती पक्षाच्या सूत्रांनी दिली. २ फेब्रुवारी रोजी चार्टर्ड फ्लाइटने येथे आलेल्या झारखंडच्या आमदारांना येथील शमीरपेठ येथील लिओनिया होलिस्टिक डेस्टिनेशनवर नेण्यात आले आणि या सुमारे ४० आमदारांना एआयसीसी सचिव आणि प्रभारी दीपा दास मुन्शी यांच्या सावध नजरेखाली ठेवण्यात आले आहे.
दीपा दास मुन्शी या आमदारांच्या बंदोबस्तावर सतत देखरेख ठेवून आहेत. अनधिकृत प्रवेश रोखण्यासाठी पक्ष व्यवस्थापकांनी सावधगिरीही बाळगली आहे. ज्या रिसॉर्टमध्ये आमदार राहतात त्या मजल्यावर प्रवेश करण्यासाठी केवळ एक लिफ्ट वापरली जात आहे, ज्याचा वापर आमदारांव्यतिरिक्त केवळ अधिकृत व्यक्तीच करू शकतात. इतर लिफ्टचा वापर करून किंवा इतर मार्गांनी आमदार मुक्काम केलेल्या ठिकाणी कोणीही पोहोचू शकत नाही. पोलीस अधिकारी सतत २४ तास लिफ्टच्या बाहेर पडण्याच्या आणि प्रवेशाच्या बिंदूंवर पहारा देत आहेत. ज्या खोल्यांमध्ये आमदार राहतात त्या खोल्यांवरही पोलीस कर्मचारी पहारा देता आहेत.
तसेच, पहिल्या मजल्यावर आमदारांसाठी स्वतंत्र जेवणाची व्यवस्था करण्यात आली आहे, तेथे इतर पाहुण्यांना प्रवेश नाही. तेथे केवळ आमदारच भोजन घेऊ शकतात. डायनिंग हॉलमध्येही कडेकोट पोलिस बंदोबस्त ठेवण्यात आला आहे. सूत्रांनी सांगितले की, आमदारांकडे फोन अजूनही आहेत आणि रिसॉर्ट साध्या वेशातील पोलिस अधिकाऱ्यांनी गजबजले आहे. रिसॉर्टकडे जाणाऱ्या रोडवर पोलिसांनी बॅरिकेड्स लावले असून वाहनांच्या प्रवेशावर बंदी घालण्यात आली आहे. विस्तृत बँक्वेट हॉल, बैठक आणि कार्यक्रमांसाठी स्वतंत्र व्यवस्था अशा सुविधा तेथे आमदारांना उपलब्ध आहेत. तेलंगणा काँग्रेसच्या सूत्रांनी सांगितले की झारखंडचे आमदार ५ फेब्रुवारी रोजी रांचीला रवाना होतील, जेव्हा चंपाई सोरेन सरकारला विश्वासदर्शक ठरावाचा सामना करावा लागणार आहे.
