पुसेगाव, (प्रतिनिधी)- भारतातील नद्या बहुतांशी पश्चिमेकडून पूर्वेकडे वाहतात. परंतु, नर्मदा ही एकच नदी अशी आहे की ती पश्चिमेकडे वाहते. नर्मदा म्हणजे शंकर पार्वती यांची कन्या आहे. नर्मदेच्या पवित्र स्नानाने पापमुक्ती होते, तिच्या दर्शनाने मानवी दुःख हरण होते आणि तिच्या परिक्रमेमुळे माणूस पुण्य प्राप्ती होऊन स्वर्गप्राप्तीचा दावेदार होतो अशी आख्यायिका आहे. म्हणून माणसाने जीवनामध्ये एकदा तरी नर्मदा परिक्रमा पूर्ण करावी, असे आवाहन श्री सेवागिरी देवस्थान ट्रस्टचे मठाधिपती सुंदरगिरी महाराज यांनी केले.
पुसेगाव येथील मंगेश संजयराव जाधव, शुभम यादव आणि संतोष शेडगे या युवकांनी मागील तीन महिन्यांत तीन हजार सहाशे किलोमीटरचा पायी प्रवास करीत नर्मदा परिक्रमा पूर्ण केली. यानिमित्ताने देवस्थान ट्रस्टच्यावतीने व ग्रामस्थांतर्फे त्यांचा सत्कार करण्यात आला.
याप्रसंगी देवस्थानचे चेअरमन रणधीरशेठ जाधव, विश्वस्त डॉ. सुरेश जाधव, बाळासाहेब जाधव, संतोष वाघ, सचिन देशमुख, गौरव जाधव व ग्रामस्थ उपस्थित होते. सुंदरगिरी महाराज म्हणाले, नर्मदा परिक्रमा पूर्ण करण्यासाठी अनेक भक्त सहभागी होत असतात. परंतु, ही परिक्रमा खडतर व मेहनतीची आहे.
यावेळी मंगेश जाधव, संतोष शेडगे आणि शुभम जाधव यांनी नर्मदा परिक्रमेबद्दलची सविस्तर माहिती उपस्थित ग्रामस्थांना दिली. याप्रसंगी नर्मदा नदीच्या पवित्र जलाने श्री सेवागिरी महाराजांच्या संजीवन समाधीला मंत्रोच्चारात जलाभिषेक करण्यात आला.
तत्पूर्वी नर्मदा कलशाची पुसेगावमधून वाजत गाजत मिरवणूक काढण्यात आली. यावेळी ग्रामस्थ आणि भक्तगण मोठ्या संख्येने उपस्थित होते. सचिव विशाल माने यांनी स्वागत व सूत्रसंचालन केले. सुनील धोंगडे यांनी आभार मानले.