कीव (युक्रेन) – रशियाने केलेल्या हल्ल्यात युक्रेनमधील 7 लोकांचा मृत्यू झाला आहे. तर 9 लोक जखमी झाले आहेत. क्षेपणास्त्र हल्ल्यानंतर रशियाचे सैन्यदल आता युक्रेनमध्ये घुसले असून रणगाड्यांसह हल्ले करण्यास सुरुवात केली आहे. युक्रेनमधील मारियुपोल शहरात रणगाडे घुसले आहेत. विमानतळाजवळून धूर निघत असल्याचेही वृत्त आहे. तसेच युक्रेनच्या इतर शहरांमध्येही विमानतळावर हल्ले झाल्याच्या बातम्या समोर येत आहेत.
रशियाने युक्रेनची राजधानी कीववरदेखील हल्ला केला आहे. डोन्बास प्रांतावर हल्ला करण्यात आल आहे. रशियाच्या हल्ल्याचा युक्रेनच्या सैन्याने प्रतिकार सुरू केला असून रशियन हवाई दलाला झटका दिला आहे. रशियाची पाच विमाने पाडली असल्याचा दावा युक्रेनच्या सैन्याने केला आहे. युक्रेनने नागरी विमानांसाठी हवाई वाहतूक बंद केली आहे. हल्ल्यानंतर शहर सोडून जाण्यासाठी नागरिकांची धावपळ सुरू आहे. पेट्रोलपंपांवर आणि रस्त्यांवर वाहनांच्या लांबच लांग रांगासह मोठी वाहतूक कोंडी निर्माण झाली आहे.
युक्रेन हा देश 1990 पर्यंत सोव्हिएत महासंघाचा भाग होता. सोव्हिएत महासंघाचे विघटन झाल्यानंतर युक्रेन स्वतंत्र झाला. युक्रेनच्या वाट्याला सोव्हिएत महासंघाच्या काळात विकसित करण्यात आलेले महत्त्वाचे बंदर, लष्करी विभाग आले. स्वातंत्र्यानंतर युक्रेनचे रशियासोबत चांगले संबंध होते. वर्ष 2014 पर्यंत व्हिक्टर यानुकोविच राष्ट्रपतीपदावरून हटण्याआधी रशियासोबत चांगले संबंध होते. मात्र, त्यांच्या पश्चात आलेल्या सरकारने रशियाविरोधी भूमिका घेतली. त्यामुळे युक्रेनमधील रशियन भाषिक प्रदेशात अस्थिरता निर्माण झाली असल्याचा आरोप करण्यात आला.