जळोची – लग्न, गृहप्रवेश, वाहनखरेदी आदी शुभकार्यासाठी मुहूर्त काढले जातात. हे आपण नेहमीच ऐकतो. मात्र चोरट्यांनी चक्क ज्योतिषाकडून जबरी चोरीचा मुहूर्त काढला. चोरीही यशस्वी झाली. मात्र मुहूर्त काढूनही चोरटे अडकले पोलिसांच्या जाळ्यात अडकले आहेत.
बारामती तालुका पोलीस ठाण्याच्या हद्दीतील देवकाते नगर येथील महिलेचे हातपाय बांधून तिला मारहाण करत तब्बल एक कोटी सात लाख रुपयांचा दरोडा टाकणाऱ्या चोरट्यांना पकडण्यात पुणे ग्रामीण स्थानिक गुन्हे शाखेला यश आले आहे. या प्रकरणी सहा दरोडेखोरांना अटक करण्यात आली आहे.
सचिन अशोक जगधणे (वय ३०, रा. गुणवडी, २९ फाटा, ता. बारामती), रायबा तानाजी चव्हाण (वय ३२, रा. शेटफळ हवेली, ता. इंदापूर), रविंद्र शिवाजी भोसले (वय २७, रा. निरावागज, बारामती), दुर्योधन उर्फ दिपक उर्फ पप्पू धनाजी जाधव (वय ३५, रा. जिंती हायस्कूलजवळ, ता. फलटण, जि. सातारा), नितीन अर्जून मोरे (वय ३६, रा. धर्मपुरी, ता. माळशिरस, जि. सोलापूर) याच्यासह रामचंद्र वामन चव्हाण (वय ४३, मूळ रा. आंदरुड, ता. फलटण, जि. सातारा, सध्या रा. वडूज, ता.खटाव, जि. सातारा) अशी या दरोड्यातील आरोपींची नावे आहेत.
सागर शिवाजी गोफणे हे पत्नी तृप्ती व दोन मुलांसह देवकाते नगर येथे राहतात. दि. २१ एप्रिल रोजी सागर हे तिरुपती बालाजीच्या दर्शनासाठी गेले होते. त्यावेळी त्यांची पत्नी तृप्ती व मुले घरी होती. घरी असताना रात्री आठ वाजताच्या सुमारास दरोडेखोरांनी गोफणे यांच्या घराच्या कंपाउंड वरून घरात प्रवेश करत. तृप्ती यांना मारहाण केली.
तसेच त्यांचे हात-पाय बांधून त्यांच्या कापडाचा बोळा कोंबून. ९५ लाख ३० हजाराची रोख रक्कम, ११ लाख ५९ हजार रुपयांचे २० तोळे दागिने, ३५ हजार रुपयांचा मोबाईल असा १ कोटी ७ लाख रुपयांचा ऐवज जबरीने चोरून नेला होता. याप्रकरणी अज्ञातांविरोधात तालुका पोलिस ठाण्यात गुन्हा दाखल करण्यात आला होता. या घटनेमुळे शहरात एकच खळबळ उडाली होती.
सदर चोरीचे गांभीर्य लक्षात घेऊन विशेष पोलिस महानिरीक्षक सुनील फुलारी हे स्वतः या चोरीच्या तपासाबाबत आग्रही होते. त्यानुसार पोलिस अधिक्षक अंकित गोयल यांनी स्थानिक गुन्हे शाखेची पथके नेमली होती. तांत्रिक विश्लेषण व गोपनीय खबरीच्या आधारे अखेर दरोडेखोरांना जेरबंद करण्यात आले.
विशेष म्हणजे आरोपींनी आपण पकडले जावू नये, याची पुरेपुर खबरदारी घेतली होती. कोणताही मागमूस मागे ठेवला नव्हता. या गुन्ह्यातील आरोपी एमआयडीसीतील मजूर असल्याची माहिती मिळाल्यानंतर संशयितांवर बारकाईने नजर ठेवण्यात आली. वेगवेगळ्या ठिकाणाहून वरील दरोडेखोरांना ताब्यात घेण्यात आले आहे.
सागर गोफणे हे जमीन खरेदी विक्रीचा व्यवसाय करत असल्याने त्यांच्याकडे भरपूर पैसा असल्याची माहिती आरोपी सचिन जगधणेला मिळाली होती. जगधने याने सदर गुन्ह्याचा कट रचला. आणि आरोपी रामचंद्र चव्हाण या ज्योतिषाकडे मुहूर्त काढून हा जबरी दरोडा टाकण्यात आला होता. अद्यापपर्यंत पोलिसांनी ७६ लाख ३२ हजार रुपयांचा मुद्देमाल हस्तगत केला आहे. त्यात ६० लाख ९७ हजाराची रोख रक्कम असून १५ लाख ३५ हजार रुपये किमतीचे २६ तोळ्याचे दागिने हस्तगत करण्यातआले आहेत.