पुणे – वीज मीटरमध्ये फेरफार करून तीन कारखान्यांमधील 2 लाख 93 हजार 216 युनिटची म्हणजे 45 लाख 64 हजार रुपयांची वीजचोरी महावितरणच्या भरारी पथकांनी नुकतीच उघडकीस आणली. वीजचोरीच्या तीनही प्रकरणांमध्ये वीजचोरी व दंडाचे एकूण 84 लाख 84 हजार रुपयांचे वीजबिल दिले आहे.
पुणे शहरातील खडी मशीन रस्त्यावरील फायबर ग्लास इंड. एक्यूपमेन्टस् या औद्योगिक ग्राहकानेदेखील मंजूर वीजभारापेक्षा अधिक वीजवापर करीत रिमोटच्या साह्याने गेल्या 15 महिन्यांत 74 हजार 534 युनिटची म्हणजे 12 लाख 50 हजार रुपयांची वीजचोरी केल्याचे आढळून आले. वीजचोरी व दंडाचे या ग्राहकास 17 लाख 60 हजार रुपयांचे वीजबिल देण्यात आले आहे.
तसेच, भोसरी एमआयडीसीमधील प्रिसिशन टेक्नॉलॉजी अँड हिट हिटर्स या औद्योगिक ग्राहकाने मंजूर जोडभारापेक्षा अधिक वीज वापरत तसेच मीटरमध्ये फेरफार करून गेल्या सात महिन्यांमध्ये 1 लाख 10 हजार 490 युनिटची म्हणजे 16 लाख 79 हजार रुपयांची वीजचोरी केल्याचे आढळून आले. वीजचोरी व दंडाचे या ग्राहकास 40 लाख 19 हजार रुपयांचे वीजबिल देण्यात आले आहे.
खेड तालुक्यातील धानोरे येथील आनंद वायर प्रॉडक्ट प्रा.लि. या औद्योगिक ग्राहकाने वीज मीटरमध्ये फेरफार करून गेल्या नऊ महिन्यांमध्ये 1 लाख 8 हजार 192 युनिटची म्हणजे 16 लाख 35 हजार रुपयांची वीजचोरी केल्याचे निदर्शनास आले. वीजचोरी व दंडाचे या ग्राहकास 27 लाख 5 हजार रुपयांचे वीजबिल देण्यात आले आहे. या तिनही कारखान्यांतील वीजचोरीप्रकरणी भारतीय विद्युत कायदा 2003 मधील कलम 135 नुसार कारवाई सुरू आहे.
वीजचोरी उघडकीस आणण्यासाठी सुरक्षा व अंमलबजावणी विभागाचे कार्यकारी संचालक (प्रभारी, मुंबई) कमांडर शिवाजी इंदलकर यांच्या मार्गदर्शनात भरारी पथकाचे उपकार्यकारी अभियंता आवधकिशोर शिंदे, कनिष्ठ अभियंता कैलास काळे, सहायक सुरक्षा व अंमलबजावणी अधिकारी अश्विनी भोसले, वरिष्ठ तंत्रज्ञ ज्ञानेश्वर शेवाळे आदींनी ही कामगिरी केली.