पिंपरी – पिंपरी-चिंचवड पोलीस आयुक्तालयातील पोलीस ठाण्यांमध्ये असलेल्या तपास (डीबी) पथकांमध्ये एक प्रकारे मरगळ आली आहे. ही मरगळ वाढत्या गुन्हेगारीला खतपाणी घालणारी ठरू लागली आहे. मरगळ झटकून काम करणे गरजेचे असून सर्व पोलीस ठाण्यातील डीबीच्या पुनर्रचनेबाबत पोलीस आयुक्त लवकरच आढावा घेणार आहेत.
आयुक्तलयातील शिरगाव परंदवडी, तळेगाव एमआयडीसी ही पोलीस ठाणी वगळता प्रत्येक पोलीस ठाण्यामध्ये डीबी पथक आहे. या पथकाला पोलीस ठाण्याचे नाक समजले जाते. सहायक निरीक्षक किंवा उपनिरीक्षक दर्जाच्या अधिकाऱ्याची या पथकाच्या प्रमुख पदी नियुक्ती केली जाते. तसेच, दहा ते पंधरा कर्मचाऱ्यांची पथकात नेमणूक केली जाते. हद्दीची व गुन्हेगारांची इत्यंभूत माहिती असणाऱ्या कर्मचाऱ्यांना या पथकामध्ये घेणे अपेक्षित असते. मात्र, अलिकडच्या काळात अधिकाऱ्यांच्या मागे-पुढे करणाऱ्यांची या पथकामध्ये जास्त प्रमाणात भरती असल्याचे दिसून येते. याचा परिणाम डीबी पथकांच्या कामगिरीवर जाणवू लागला आहे.
हद्दीमध्ये एखादा गुन्हा घडल्यास डीबी पथकातील कर्मचाऱ्यांनी तत्काळ घटनास्थळी पोहोचणे महत्वाचे असते. घटनास्थळी मिळालेल्या प्राथमिक माहितीनुसार संशयित गुन्हेगारांची उचलबांगडी करून चौकशीअंती गुन्हा उघड करण्याची सर्वस्वी जबाबदारी डीबी पथकाची असते. अलिकडच्या काळात गंभीर गुन्हा वगळता डीबी पथकातील कर्मचारी घटनास्थळी फिरकतही नसल्याचे चित्र आहे. गुन्हेगाराला फरफटत आणण्यापेक्षा पोलीस ठाण्यात बसून मध्यस्थांमार्फत आरोपी हजर करण्याला पसंती दिली जात आहे. त्यामुळे आरोपींना डीबी पथकांची भीती उरली नाही.
आयुक्तालयातील सर्व डीबी पथकांबाबत माहिती घेतली जात आहे. डीबीमध्ये सक्षम अधिकारी आणि कर्मचाऱ्यांची आवश्यकता आहे. यापूर्वी काही पथकांवर कारवाई झाली आहे. त्याचा आढावा घेऊन योग्य निर्णय घेतला जाईल.
– विनयकुमार चौबे, पोलीस आयुक्त
गंभीर गुन्ह्यात डीबीची कमतरता जाणवतेय
आयुक्तालयातील वाकड, निगडी, देहूरोड पोलीस ठाण्यातील डीबी पथकांवर झालेल्या कारवाईची कमतरता गंभीर गुन्हे घडल्यानंतर जाणवू लागली आहे. वाकड आणि सांगवी पोलीस ठाण्याच्या हद्दीत वाहनांची तोडफोड, कॉलेजमधील राडे आणि वकील अपहरण खून प्रकरणात डीबीची कमतरता जाणवली. स्थानिक पोलिसांना धावपळ करताना मर्यादा येत असल्याचे प्रकर्षाने दिसून आले. ज्या पोलीस ठाण्यांमध्ये डीबी अस्तित्वात आहे, त्यातील काही डीबी पथके काय कामगिरी करतात हे समजणे दुरापास्त होत आहे.
वरिष्ठांची नाराजी अन डीबीचे दुखणे
गंभीर गुन्हे उघडकीस आणण्यासाठी डीबी पथके कमी पडू लागल्याची नाराजी वरिष्ठ अधिकारी व्यक्त करीत आहेत. मात्र अलिकडच्या काळात शहरात पोलिसांना वारंवार बंदोबस्ताचे काम लागले. आंदोलने, ग्रामपंचायत निवडणुका, 31 डिसेंबर, इतर सण, उत्सव त्यातच अतिमहत्वाच्या (व्हीआयपी) लोकांची शहरात वाढलेली येजा यामुळे पोलीस ठाण्यातील सर्व पोलीस तसेच डीबीचेही पोलीस बंदोबस्तात अडकून पडले. इतर कामांचा ताण वाढल्याने गुन्हे उघडकीस आणण्यासाठी वेळ मिळत नसल्याची खंत डीबीचे अधिकारी
व्यक्त करतात.