पिंपरी – पिंपरी चिंचवड शहरातील करोनाबाधित रुग्णसंख्येमध्ये घट होत असल्याने दिलासा मिळाला आहे. गेल्या आठवड्यामध्ये बाधितांच्या संख्येमध्ये मोठी वाढ झाली होती. मात्र या आठवड्यामध्ये बाधितांच्या संख्येमध्ये घट होत असल्याने दिलासा मिळाला आहे. आज शहरामध्ये सर्वाधिक 5181 बाधित बरे झाल्याची नोंद करण्यात आली आहे.
शहरातील बाधितांच्या संख्येमध्ये हळूहळू घट होत आहे. शुक्रवारी (दि. 28) 2261 जणांना करोनाची लागण झाली. आजपर्यंत शहरातील 3 लाख 42 हजार 208 जणांना करोनाची लागण झाली आहे. आज दिवसभरात मागील एकाही बाधित रुग्णाच्या मृत्यूची नोंद झाली नाही. मात्र गेल्या 24 तासात तीन बाधित रुग्णांचा मृत्यू झाला.
आजपर्यंत शहरातील 4554 करोनाबाधितांचा मृत्यू झाला आहे. पहिल्या व दुसऱ्या लाटेमध्ये दैनंदिन बाधितांची संख्या साडेतीन हजार ते चार हजारापर्यंत येत होती. करोनाच्या तिसऱ्या लाटेमध्ये बाधितांच्या संख्येने मागील दोन्ही लाटेचे रेकॉर्ड तोडत बाधितांच्या संख्येने उच्चांक गाठला. मागील आठवड्यामध्ये दैंनदिन रुग्णांची संख्या पाच हजारापर्यंत गेली होती. मात्र या आठवड्यामध्ये बाधितांच्या संख्येमध्ये घट होत असून करोनामुक्त रुग्णांची संख्या वाढली आहे.
आज करोनाची लागण होणाऱ्या रुग्णांपेक्षा करोनामुक्त होणाऱ्यांची संख्या वाढली आहे. दिवसभरामध्ये 5181 बाधित रुग्ण बरे झाल्याची नोंद करण्यात आली आहे. त्यामुळे बरे झालेल्या रुग्णांची संख्या 3 लाख 14 हजार 437 इतकी झाली आहे. सद्यस्थितीत रुग्णालये व कोविड केअर सेंटरमध्ये 504 तर गृहविलगीकरणात तब्बल 23,444 बाधितांवर उपचार सुरू आहेत. दोन्ही मिळून उपचाराधीन असलेल्या रुग्णांची संख्या 23,948 इतकी आहे.
