वॉशिंग्टन : धूम्रपान करणे ही आधुनिक काळातील एक जीवनशैली मानली जाते. धूम्रपानाचे तोटे जरी सर्वच आरोग्य यंत्रणा समोर आणत असल्या तरी धुम्रपानाचे प्रमाणही वाढले आहे. अर्थात फक्त धूम्रपान करणाऱ्यांनाच धुम्रपानाचा त्रास होतो असे नाही तर धूम्रपान न करणाऱ्यांना पण जास्त त्रास होतो.
धूम्रपान न करता फुफुसात जाणाऱ्या धुराचा जास्त त्रास होतो, अशा व्यक्तींना पॅसिव्ह स्मोकिंगचे बळी असे म्हटले जाते. धूम्रपान करणाऱ्या एखाद्या व्यक्तीच्या आसपास तुम्ही असाल तर धुम्रपानाच्या सवयीमुळे निर्माण झालेला धूर फुफुसात आपोआपच जातो. त्याचे दुष्परिणाम आगामी कालावधीमध्ये दिसू लागतात. आधुनिक संशोधनाप्रमाणे दर वर्षी पॅसिव्ह स्मोकिंगमुळे सहा लाखपेक्षा जास्त लोकांचा बळी जातो.
जागतिक आरोग्य संघटनेने दिलेल्या माहितीप्रमाणे, धुम्रपानाचा हा कल कायम राहिला तर 2030 पर्यंत दरवर्षी ऐशी लाख पेक्षा जास्त लोक धूम्रपानामुळे बळी पडू शकतात. सिगरेटच्या उत्पादनासाठी वापरण्यात येणाऱ्या तंबाखूमध्ये अनेक खतरनाक आणि धोकादायक अशी रसायने असतात. त्यांची एकत्रित प्रक्रिया आरोग्यासाठी धोकादायक ठरते. गर्भवती महिलेला जर पॅसिव्ह स्मोकिंगचा त्रास झाला तर त्याचा थेट परिणाम तिच्या गर्भातील बाळावरही होऊ शकतो. अशी मुले जन्मजात दिव्यांग असू शकतात किंवा एखादा दोष त्यांच्यामध्ये निर्माण होऊ शकतो.
पॅसिव्ह स्मोकिंगच्या अतिरेकी परिणामामुळे गर्भातच बाळाचा मृत्यूही होऊ शकतो. धूम्रपान करणारा जेव्हा सिगरेटचा आनंद घेत असतो तेव्हा त्यामुळे निर्माण होणाऱ्या धुरापैकी बहुतांशी धूर जरी त्याच्या फुफुसात जात असला तरी काही धूर वातावरणात मिसळत असतो. आणि या धुराचा तोटा इतर लोकांना होतो.
आरोग्य संघटनेने दिलेल्या माहितीप्रमाणे, तंबाखूच्या धुरामध्ये 7000 रसायने असतात त्यापैकी 69 रसायने अशी आहेत ज्यामुळे कर्करोगाची निर्मिती होऊ शकते. एखादी व्यक्ती धूम्रपान करत नसली तरी आणि तिचे तिचे मित्र किंवा नातेवाईकांना धुम्रपानाची सवय असेल आणि त्यांच्या धुम्रपानामुळे पॅसिव्ह स्मोकिंगचे बळी हे लोक ठरत असतील तर हृदयविकार किंवा इतर विकार जडण्याचे प्रमाण 20% ने वाढू शकते, असेही संशोधनातून समोर आले आहे.